Anda di sini

BN nadai penanggul menang besai PRK Balingian

Advertisement

KUCHING: Presiden Parti Progresif Demokratik Sarawak (SPDP) Tan Sri William Mawan pechaya Barisan Nasional (BN) nadai penanggul menang nengah majoriti ke jauh lebih besai ba Pengawa Bepilih Mit (PRK) Dun Balingian.

Ku iya, mesin pengawa bepilih BN udah disikap enggau manah lalu deka ngerapit rayat ba tiap kandang endur nya.

“BN udah teleba enggau tiap kandang endur ke kena bungkur DUN Balingian lalu mesin sereta raban pengawa bepilih mit BN deka neresa ngagai tiap kandang endur nya ngerapit rayat.

“Baikka nya kandang endur bansa Melanau, China tauka Iban, BN deka nentuka sida enda ditinggal,”ku iya.

Mawan mansutka jaku tu lebuh dikerandau pemberita pengudah nerima penemuai raban ari Sarawak Dayak Graduate Association (SDGA), Serakup Indu Dayak Sarawak enggau Gerija St Micheal (Suduh)  ba opis iya di Bangunan Baitulmakmur Petra Jaya ditu, kemari.

Iya nambah, ketegal nya pengawa bepilih mit, raban BN nengeri deka disaup raban BN renggat menua lalu iya pechaya sereta nyadang chalun BN deka menang nengah majoriti ke jauh lebih besai ari ke udah.

“Kitai deka nentuka nadai kandang endur di sitak nya ditinggal. Isu enggau penanggul ke ditapi rayat deka diputar.

“Kitai ngembuan kuasa meri semaya lalu ngamatka semaya. Rayat di Balingian deka diiring ngambika bela ngasai pemansang,”ku iya seraya ti madah raban ari SPDP mega udah begulai enggau serakup parti BN ke bukai bekimpin di Balingian.

Ba pengawa bepilih nya, BN deka diarika chalun Parti Pesaka Bumiputera Bersatu (PBB) Yussibnosh Balo lalu deka disatup chalun Parti Keadilan Rakyat (PKR) Abdul Jalil.

Ba pengawa Bepilih Nengeri 2011, Pehin Sri Abdul Taib Mahmud ari PBB menang nengah majoriti 5,154 undi ngalahka chalun PKR Suriati Abdullah enggau Datuk Salleh Jafaruddin (chalun ngatika diri).

Penuduk DUN Balingian puang pengudah Taib ngelengka pangku pengawa nyadi Kepala Menteri kena ke 28 Februari ke udah.

DUN Balingian bisi 13,366 orang ngundi berejista ke tau ngundi ke alai ari penyampau nya 133 orang ngundi tumu.

Komiti Pengawa Bepilih (SPR) udah netapka PRK Balingian diatur kena 29 Mac 2014.

Advertisement