Anda di sini

Penyampau jali tembu kena mayar tambang

Advertisement

UNGKUP DEK: Tuai Rumah John Mato (kiba) nyuaka tepa ngagai Harden seraya dikemata Entri (kanan) sereta sida bukai.

Peminta nambahka penyampau jali nya deka diperunding enggau timbal ke diterima ari serata nengeri

MIRI: Chairman PBB Marudi, Kaunsilor Kalang Jok minta perintah nambahka penyampau lon ari RM10,000 ngagai RM20,000, dalam Skim Pinjau Rumah di baruh Opis Menteri Pengawa Berumah.

Iya madah, penyampau nya patut ditambah laban ungkus tambang aja nyau semak manggai 60 peratus, kelebih agi menua pesisir tauka ulu entigis di Baram.

“Ungkup tambang aja, genap pintu rumah panjai bisi nya melanja ke tambang manggai ngagai RM6,000, ngujungka laluh pinjau semina tinggal RM4,000 dikena bebelika ramu,” ku iya.

Kalang mantai pekara tu lebuh bejaku ngelaluka penatai Menteri Muda Pengawa Berumah, Datuk Francis Harden Hollis ke nemuai ngagai Long Jegan, Tanjung Mawan enggau Long Tuyut di Bakong, Hari Minggu tu tadi.

Bisi nyempulang Harden iya nya Menteri Muda Perengka Rama (Bekal Ai), Datuk Sylvester Entri Muran ke mega ADUN Marudi.

Nundaku Kalang, perambu penyampau nya ditambah ari serata negeri ke minta perintah nambahka lon ari RM10,000 ngagai RM20,000, sepintu (rumah panjai).

Pinta nya mega dibantaika Chairman Kaunsil Penyanding Penemu 1Malaysia, Sarawak, Datuk Joseph Salang Gandum bulan Januari tu tadi.

Berebak enggau nya, Harden dalam jaku iya madah, Opis Menteri Pengawa Berumah di baruh Datuk Amar Abang Johari Tun Abang Openg, benung berundingka peminta nya, senipak enggau timbal balas ke diterima ari serata nengeri.

“Komiti ke dipilih deka baum dalam bulan April tu lalu urung 600 peminta pinjau rumah panjai deka diperunding, nyengkaum tiga peminta diterima ari Baram,” ku Harden.

Skim pinjau penyampau RM10,000 ukai diberi dalam mata duit tang diberi nengah penyampau rega ramu, seraya servis konteriktor dipilih Menteri Pengawa Berumah.

Harden ke mega Menteri Muda Pemansang Menua Pesisir madah, lon diberi nengah bebelika ramu lalu timpuh mayar lon nya 25 taun lalu maksimum bayar genap bulan nya RM65.

Naka 31 Disember taun siti nyin tadi, lebih 500 buah rumah panjai mungkur 12,000 ruang bilik agi nganti lon sida dikemendar.

Advertisement