KAPIT: Seiku orang dagang peranak menua nya, Datuk Kristoffer Nyuak Bajok empai lama ke udah nemuai ngagai Rumah Jenggot enggau Rumah Lutau, Nanga Bulo, Batang Rajang, penyauh sejam setengah pejalai ari ditu.
Penemuai iya sekali tu sebaka enggau tuju pejalai iya ba sekeda sitak Pelagus, iya nya betemu enggau nembiak redak, penyukung sereta pengundi.
Baka penemuai Nyuak ngagai sekeda rumah panjai bukai sebedau tu, penatai iya disambut enggau manah ari peranak rumah panjai ba kandang menua nya.
Maya nya, Nyuak udah nemuai ngagai Rumah Lutau sereta bemalam ba Rh Jenggot, Nanga Bulo laban ngulu pengerami ke diatur ba rumah panjai nya.
Bisi 300 iku nyengkaum 27 Tuai Rumah ari rumah panjai ke besemak dia enggau raban iya ari Kapit, meri sukung ngagai Nyuak.