Anda di sini

Nengah pemanah penyikap, Pengerami Bungin deka dikemanahka agi: Uggah

Advertisement

SPAOH: Perintah udah ngemendarka ungkup  belanja RM50,000 kena ngemanahka perengkaguna ba palan endur ngatur Pengerami Bungin, di Spaoh ditu.

Menteri Bekebun Bedandang Besai enggau Komoditi Malaysia, Datuk Amar Douglas Uggah Embas madah, pengawa ngemanahka perengkaguna nya deka berengkah taun tu, kena nyendiaka diri ngatur pengerami taun baru ila.

“Kami arap, enti perengkaguna nya udah tembu digaga, pengerami nya deka diatur baru taun dudi, iya manah agi ari taun ke udah,” ku iya.

Iya ke mega Kaban Parlimen Betong bejaku munyi tu lebuh bejadika Pengerami Bungin 2014 ba Tebing Sungai Genturung Pendiau Bungin, Batang Saribas ditu pagi kilah ensanus.

Ku iya nandu, pengerami Bungin ke diatur nya mega ulih nyaup ngelakuka genturung pendiau Bungin ngagai mensia mayuh ari luar Betong.

“Aku arap, enti projek ngemanahka palan nya tembu ila, mayuh produk ari genturung pendiau kita ulih dikelaku sereta nyungkak ekonomi peranak menua ditu.

“Enti projek tu udah tembu ila, perintah mega arapka mayuh agi temuai ari luar nemuai ngagai Bungin taun baru, lalu kami melabaka genturung pendiau Bungin mega ulih nyadi palan endur nemuai ke tebilang di pelilih menua tu,” ku iya.

Berebak enggau nya, iya meransang rayat di Bungin majak ngemanahka rampa ba kandang genturung pendiau nya, ngambika dipeda manah belama sereta ulih matak penatai temuai.

“Peranak menua tu patut landik ngasilka produk ti tau nyadika tepa ngambi bisi ke pengingat bala temuai ke udah nemuai kitu.

“Nya meh tanggungpengawa raban indu ditu kena nyungkak ekonomi ruang bilik enggau genturung pendiau kita ditu,” ku iya.

Sama bisi ngulu pengerami nya, Kaban Kunsil Nengeri (ADUN) Saribas, Mohd Razi Sitam, Residen Pelilih Betong, Datu Romie Sigan Daniel enggau Chairman Pengatur Pengerami Bungin 2014, Abang Morni Abang Ahmad.

Beserimbai enggau pengerami nya, Uggah ngemendarka ungkup belanja RM 25,000 ngagai komiti pengatur pengerami ngambika bisi dikena melanja sida ngatur pengawa nya taun baru ila, lalu Razi mega ngungkup RM20,000 kena tuju ke sama.

Kelimpah ari nya, Uggah mega ngemendarka 217 igi tangki ai ngagai 217 iku peranak genturung pendiau dia.

Advertisement