Anda di sini

MOH ngiga chara mantu pemeli rumah, ku Abg Jo

Advertisement

NGIGA CHARA MUTAR PEMAR REGA RUMAH: Abang Johari (tiga kanan) dalam aum pengarang berita seraya disempulang Karim (tiga kiba) enggau Harden (dua kanan) sereta ke bukai. — Gambar Kong Jun Liung

Opis menteri, HDC, JPN, SPNB, PR1MA besaup nyendiaka mayuh agi rumah dikena nurunka rega

KUCHING: ‘Housing Development (Control & Licencing) Bill 2013’ ti udah dikemendarka Kunsil Nengeri (DUN) ba bulan November 2013 senipak enggau trend, pemansang sereta isu industri pengawa berumah di nengeri tu.

Menteri Pengawa Berumah (MOH), Datuk Amar abang Johari madah, Undang-undang ke baru nya ngemanahka pengawa nyaga hak pemeli rumah di nengeri tu.

“Di baruh Undang-undang ke baru tu, tiap pemaju ti belisin dipinta muka sereta ngintu tauka nyaga Akaun Pemansang Pengawa Berumah ba tiap projek (pemansang pengawa berumah) ti dikemendarka.

“Pekara bekaul enggau undang-undang tu udah diterang ngagai pemaju sereta sida (pemaju) ulih nerima ubah dalam undang-undang baru,” ku iya seraya madah, pekara nya diterangka maya ‘State Housing Coordination Committee’ (SHCC) No.1/2014.

Abang Johari mansutka pekara nya dalam aum pengarang berita pengudah nyadi chairman SHCC No.1/2014 ti diatur ba sebengkah hotel ditu, kemari.

Atur enggau Undang-undang ke baru nya diatu benung ba renggat kepenudi pengudah diperunding enggau piak ti bekaul, ti dipelabaka ulih dikemeran tauka dipejalaika tengan taun tu.

Nambahka nya Abang Johari dalam aum pengarang berita nya mega bisi ngenang rega rumah ti udah kelalu mar lalu deka berati enggau mutarka pekara nya dikena mantu rayat.

Nitihku iya rega rumah teres dua tingkat entara RM300,000 ngagai RM350,000, ti enda ulih dibeli ruang bilik ke teulihka penatai pemisi baruh ari RM3,000 sebulan.

“Berindik ari rega rumah ti kelalu mar, piak Opis Menteri Pengawa Berumah enggau ejensi perintah lebih agi nengah ‘Perbadanan Pembangunan Perumahan’ (HDC) begulai enggau perintah besai nengah ‘Jabatan Perumahan Negara’ (JPN), ‘Syarikat Perumahan Nasional Bhd’ (SPNB) enggau ‘Perbadanan Perumahan Rakyat 1Malaysia’ (PR1MA) deka beserakup nyendiaka mayuh agi rumah dikena nurunka rega rumah ba makit.

“Nya alai kami deka ngiga sebengkah formula ti ulih nyendiaka rega ti senipak sereta ulih dibeli, lalu tu ulih nagang rega rumah ari kelalu mar sereta ulih nyemaka ke rega rumah,” ku iya.

Aum pengarang berita nya kemari digulu dua iku Menteri Muda iya, Datuk Abdul Karim Rahman Hamzah enggau Datuk Francis Harden Hollis enggau ke bukai.

Advertisement