KUCHING: Opis Menteri Pengawa Berumah numbuhka Mutiara Mortgage and Credit Sdn Bhd (MMCSB), ti nyali duit ngagai rayat ti ngembuan penatai pemisi sereta ulih bebelika rumah tang peminta deka nginjau duit enda diterima bank.
Menteri opis nya, Datuk Amar Abang Johari Tun Openg madah, nya dikearapka chara ulih mantu orang ti bepenatai pemisi baruh ngembuan rumah kediri.
Nitihku iya, bank mega bisi nerima belanja ari Opis Menteri Wang mega bisi nyali (Mutiara Mortgage and Credit Sdn Bhd) dikena mantu rayat ti kurang penatai pemisi ke deka bebelika rumah.
“Nengah Mutiara Mortgage and Credit Sdn kami udah nerima ungkup belanja ari perintah besai sepenyampau RM7 juta ke lalu ulih dijali ngagai orang ti ulih meli rumah tang peminta deka nginjau duit enda diterima bank.
“Perintah nengeri mega meri penyampau ti sama ti ngujungka penyampau semua RM14 juta, dikena mantu rayat nengeri tu ngambika ulih ngembuan rumah ke diri empu.
“Polisi kami enda tau enda nyendiaka peminta enggau guna rayat ti deka bebelika rumah lebih agi ke teulihka penatai pemisi RM3,000 kebaruh, laban kitai enggai meda peranak Sarawak nadai rumah,” ku iya.
Abang Johari ti mega Menteri Dagang Temuai mansutka pekara nya dalam aum pengarang berita pengudah nyadi chairman State Housing Coordination Committee Meeting (SHCC) No.1/2014 ti diatur ba sebengkah hotel ditu kemari.
Nambahka nya entara pekara ti dikeaum nyengkaum pengawa deka ngaga ‘high-rise apartment’ di kandang mengeri ti disikap enggau pengelikun sereta ulih diberi.
Iya madah, pengawa ngurus, nyaga enggau ngemanahka perengka guna ba apartment nya deka dikemataka Perbadanan Pembangunan Perumahan (HDC).
“Kitai merambu deka ngaga mayuh agi ‘high-rise apartment’ di mengeri lebih agi di Kuching, tu berindik ari rega tanah ti majak tinggi. Ari tu kitai ulih ngurangka ungkus rega tanah sereta nyendiaka rumah ke ulih dibeli mensia mayuh,” ku iya.
Sekeda projek apartment ti udah tembu digaga dibaruh Program Perumahan Rakyat iya nya di Rantau Panjang, Sibu enggau Kemena, Bintulu lalu ke baru deka digaga ba Kampaung Tabuan Melayu dalam taun 2014, ungkup orang ti kurang penatai pemisi.