SIBU: Ketegal ti suah kundang kandi ngabas nama bisi ke enda nerima Bantu Rayat 1Malaysia (BR1M), Mero Paulus, 24, minta opis ti bekaul ngatur chara ti engkeman mutarka pekara nya.
Iya pechaya pekara nya ukai semina ditapi iya seiku aja tang nyengkaum sida ke bukai.
Opis ti bekaul ku iya lebih agi baka Opis Pengumpul Chukai (LHDN) patut meri pemutus ti lengkas ngagai sida ke empai nerima BR1M.
“Anang meri kelalu mayuh dalih ngambika kami enda muai jam kundang kandi ngabas nama nerima BR1M.
“Enti bulih padahka bulih lalu enti enda padah enggau lengkas, nyemetak,” pia ku iya madah ngagai pengarang berita kemari.
Mero madah, iya kala udah bulih BR1M sebedau tu tang bepenanggul maya betemu enggau raban pengereja pengawa ba opis nya maya deka ngadu bantu nya taun tu.
“Keterubah sida madah peminta aku agi benung ba proses. Maya aku datai baru sida minta salin tingki indai aku.
“Pagi kemari maya datai baru sida ngasuh aku ngapil laban taun tu aku enda mujur bulih BR1M,” ku iya ti asal ari Kanowit.
Ketegal ti masau hari ngadu peminta nya ba opis LHDN, Mero ti kereja konterik madah iya dianu pengaji tauka tauke alai iya gawa.
“Nama ga pemedis sida madah enggau lengkas ngambi aku enda muai hari datai ngagai opis nya,” ku iya madahka baru.