Anda di sini

Kelab Kuntau Lang Nginau berengkah ngajar kaban SIDS bekuntau pagila

Advertisement

SIBU: Kelab Kuntau Lang Nginau (KKLN) Gerempung Bansa Dayak Sarawak (SDNU) Pampang Sibu deka belabuh muka kelang pagila (21 March) ti semina diungkup ngagai raban ari Sarakup Indu Dayak Sarawak (SIDS) Pampang Sibu.

Chairman KKLN tu, Barieng Balai madah, tu keterubah sida muka awak ngagai orang indu belajar kuntau.

Ku iya, taja pan baru ditumbuh pun taun tu tadi tang kelab nya sebedau tu mujur ngajar 15 iku nembiak.

“Keterubah, kami semina ngajar sida ke lelaki aja lalu raban keterubah tu udah tamat kena 23 Februari tu tadi.

“Tang ba renggat kedua tu kitai muka awak ngagai raban SIDS Pampang Sibu bela belajarka main asal kitai bansa Iban tu,” ku iya madah ngagai pengarang berita, empai lama tu tadi.

Barieng madah, naka ke diatu pengawa belajar kuntau nya diajar ba Opis SDNU Sibu enggau SIDS Sibu di Jalai Wong King Huo ditu ninting Hari Lima enggau Hari Enam berengkah ari pukul 7 ngagai 9 lemai lalu Hari Minggu berengkah pukul 2 lemai ngagai 8 lemai.

“Raban SIDS Pampang Sibu ke bisi ati deka belajar kuntau semina mayar RM70 seiku nyengkaum dua iti tauka lebih bansa bungai kuntau,” ku iya sambil madah kuntau deka diajar guru Tubu Anak Radin.

Penerang silik bekaul enggau pengawa tu tau ditanya ngagai Barieng nengah lumur 013-8107234.

Advertisement