Taja ninggalka anak sapit ti agi nusu tang iya sedia nyaup laki bekimpin ngambika mujur
MUKAH: Ngelekaka anak sapit ke beumur dua taun numpil ba tusu diri ukai penanggul ba Elizabeth Nelson mantu laki iya, Yussibnosh Balo bekimpin maya atur Pengawa Bepilih Mit (PRK) di sitak Balingian ditu.
Elizabeth enggau Yussibnosh diberekat anak tujuh iku, empat lelaki enggau tiga indu lalu dua pasang sida nya besapit. Sapit ke tuai nya lelaki seraya ke biak agi nya indu lalu seduai nya agi nusu ba iya magang.
Taja pia, seduai iya lenyau seiku anak ke timpang pendiau taun siti nyin tadi.
Ba sebengkah pengawa bejadika Program Pengelantang Mensia Mayuh enggau 1Azam ba Kpg Tellian Mukah, Elizabeth lebuh ditanya media madah, iya deka meri sukung ngagai laki sepemanjai timpuh kimpin nya dipejalaika.
Betubuh tinggi, Elizabeth indu Iban ari Simunjan, madah, setegal deka mantu laki, iya minta bala kaban belayan nulung ngibun anak iya.
“Tu udah nyadi tanggungpengawa aku nyaup laki ngambika mujur,” ku Elizabeth ke sebedau tu, semina nguan anak di rumah.
Lebuh ditanya sekalika iya udah nyikap diri nyadi bini wakil rayat, iya madahka diri enda tau enda ngubah diri dikena ngipakka pangku pengawa nya.
“Tu nya tanggungjawab bini,” ku Elizabeth.
Maya dikerandau, Elizabeth ngenggam jari Datuk Fatimah Abdullah setegal iya baban bendar laban keterubah kena interbiu pemberita.
Fatimah, nemu Elizabeth endang nadai peneleba tang besemaya megai jari Elizabeth sepemenjai timpuh kimpin nya.
“Ukai pekara muntang sepi Elizabeth ngelekaka bala anak ke agi nusu ba iya tang ga nyaup laki kimpin,” ku Fatimah.
Menteri Pengintu Pengelantang Pendiau, Pekara Orang Indu enggau Pemansang Ruang Bilik nya madah, iya deka mai Elizabeth sama kimpin ke Yussibnosh ke alai Elizabeth tau enda ibuh bejaku tang semina ngayanka mua tanda meri sukung ngagai Yussibnosh.