DITETAPKA MANGKU PENGAWA: Abdullah (dua ari kiba) besumpah mangku pengawa nyadi sekretari politik Kepala Menteri, ditu. Bela bisi ayan dia, (ari kiba ke kanan), Datuk Wilfred Nissom (Ketuai Publisiti PRS), Sharifah Hasidah Sayeed Aman Ghazali (ADUN Semariang) enggau Abu Seman Jahwie (ADUN Jemoreng).
Iya seiku mensia ke nelap, muntang enggau berandau ba sebarang endur tauka maya, ku Abdullah
KUCHING: Pengari Barisan Nasional (BN) ba Pengawa Bepilih Mit (PRK) di sitak Balingian kena 29 March tu, Yussibnosh Balo, seiku chalun ke engkeman dipilih pemesai BN bediri dia, ku chairman Kelab Backbenchers Barisan Nasional (BNBBC), Abdullah Saidol.
“Iya (Yussibnosh) peranak menua nya empu, kala nyadi Kepala Opis Pelilih Mit dia sereta ngelala peneka rayat enti dibanding enggau orang bukai ari luar sitak nya.
“Bebekalka mayuh pengelandik sereta penemu, aku pechaya iya ngelala semua pemerat tauka pematut diungkup ke peranak dia enti iya menang ba PRK nya.
“Lalau aku, semua pengundi di sitak Balingian, pansut ngundi laban nya ukai semina ngeringka chalun tang mega tanda terima kasih diberi ngagai ex-ADUN Balingian, Pehin Sri Abdul Taib Mahmud,” ku Abdullah.
Iya madah baka tu lebuh dikerandau pengudah besumpah mangku pengawa nyadi Kepala Sekretari Politik ba Opis Kepala Menteri nguluka 29 ke bukai ari empat parti komponen BN menua tu, ba mua Kepala Menteri Tan Sri Datuk Amar Adenan Satem di Wisma Bapa Malaysia ditu, kemari.
Abdullah ti mega ADUN Semop madah, chalun ke dipilih Pakatan Rakyat (PR), madahka diri diau di Bintulu, ku Abdullah:
“Semua orang ba Balingian berandau pasal pekara nya, nanya dini penunga iya ngelama tu, enti iya ngaku diri ari Balingian. Iya (chalun PR) kala bediri di Jepak maya Pengawa Bepilih Besai Menua (PRN) tu tadi tang alah, lalu udah nya iya madahka apai iya asal ari Balingian tang kaban belayan iya madah, sida iya baru betemu enggau iya tu tadi,” ku Abdullah.
Ba asal penatai ku iya, chalun PR udah alah ba pekara nya laban iya enda dikelala orang menua nya, lalu ukai semina nya aja, kati ku gaya tulung tauka pengawa ke kala digaga iya di Balingian ngelama tu, tanya Abdullah.
“Peranak menua ditu semua ngelala chalun BN, orang nemu batang pengawa iya ngelama tu. Yussibnosh Balo tu orang ke nelap, mentas. Tau perati kita ari chara iya, endang gamal orang ke nelap.
“Orang ke ngembuan perangai baka tu tau bendar nyadi pengari rayat, laban chara iya berunding, baka rayat, ngelala penanggul ke ditapi rayat lalu nemu begulai enggau semua ba sebarang endur…Aku rindu meda wakil rayat ke nelap baka nya, tu chura politik baru ti dikedekaka rayat, nyamai digusung sereta enda milih endur berandau enggau orang,” ku iya.
Ba pekara pemansang ke patut diatur enggau jampat ba sitak nya, ku Abdullah, laban Balingian dibungkur sereta disengkaum dalam sitak SCORE, universiti, padang bilun baru, sekula baru nyengkaum MRSM sereta palan pelajar tinggi bukai (IPT), Yussibnosh enti menang, pemansang menua pesisir di sitak nya patut dikemeratka.
“Atur pemansang patut mungkur pengawa ngemanahka infrastruktur di menua pesisir di Balingian lalu nya udah dilempai ba Perintah Besai nengah menteri ke bisi nemuai kitu, tu tadi.
“Ba aku, aku ngarika pengundi menua pesisir, deka madah sebedau pengawa bepilih besai nengeri (PRN) tu ila, manifesto ke udah disemaya ngagai rayat patut dipejalai enggau jampat nyengkaum manifesto maya PRU enggau PRN ke dulu suba,” ku iya.
Pengari BN Yussibnosh Balo deka betapi enggau chalun PKR, Abdul Jalil Bujang ngetanka penuduk Kunsil Nengeri (DUN) Balingian maya PRK DUN Balingian kena 29 March tu.
Penuduk DUN Balingian kusung berindik ari pemutus Pehin Sri Abdul Taib Mahmud ngetu nyadi Kepala Menteri lalu dichiri nyadi Tuai Pemegai Menua Sarawak (TYT) kena 28 Februari tu tadi.
Maya PRN 2011, Taib mujur ngetanka penuduk nya nengah majoriti 5,154 undi ngalahka chalun PKR Suriati Abdullah enggau chalun ngatika diri Datuk Salleh Jafaruddin.