KANOWIT: Sukung enggau kerejasama rayat sigi ditagih dikena ngemujurka pelin pemansang perintah ba nengeri tu.
Kaban Kunsil Nengeri (ADUN) Ngemah Alexander Vincent madah, perintah Barisan Nasional (BN) enda belampung ati ngeluarka puku dikena ngangkatka pengidup rayat ba kandang menua pesisir.
“Tang taja pan baka nya, pemansang tu deka bepenanggul enti sema rayat enda nemu nimbal pengeransing perintah.
“Ari nya, kitai enda tau enda nyukung tegut perintah BN ngambika semua tu ulih diasaika kitai nyentuk ke jemah ila,” ku iya.
Iya mantaika jaku nya maya ngulu Pengerami Pemesai Begulai enggau Rayat di Rumah Tinggai Tambi, Ulu Pedai ditu, empai lama tu tadi.
Sama bela bisi ngulu pengerami tu iya nya Tuai Rumah Tinggai empu.
Alexander madah, rayat enggau perintah enda ulih enda besaup bejalaika tanggungpengawa diri empu.
Rayat ku iya enda tau enda nyukung perintah BN lalu pia mega perintah BN enda tau enda ngamatka danji sida ngagai rayat.
“Dua pekara tu mai reti ti besai ngagai pemansang menua kitai.
“Kedua-dua piak bela nemu nunduk ke pangan diri,” ku tandu iya.
Ba maya ke datai nemuai nya, Alexander bisi nyuaka bantu RM25,000 dikena nyeruri rumah panjai nya.