BETONG: Ketuai Opis Tanah enggau Survei Betong, Anthony Aboi sekali agi dikearapka mangku pengawa nyadi Chairman Kelab Lumba enggau Main sereta Rekreasi, Opis Tanah enggau Survei Betong (Landas Betong) ungkup renggat 2014/2015.
Ba pengawa milih ke dipejalaika maya aum dua taun sekali ti diatur empai ke udah, sekeda pangku pengawa bukai raban Komiti (AJK) ke tinggi dalam gerempung nya nadai berubah.
Pangku pengawa Sapit Chairman mengkang di pangku Juru Ukur Opis Tanah enggau Survei Betong, Bakeri Samsuddin, Sekreteri mengkang dipangku Jimbu Giman sereta dibantu Denny Tinggang.
Philip Sandai mengkang nyadi Tukang Wang dibantu Belenyun Medan.
Kaban Komiti baru ke dipilih maya aum nya baka Madelin Ambit, John Linggi, Victor Philip, Nyandang Jambol, Gabriel Sultan Entalai, Mohd Zaidol Zain enggau Zulkurnaidi Saman.
Lebuh ke bejaku,Chairman Landas Betong, Anthony Aboi meransang orang ti bari dichiri nya regas agi berundingka perambu kena ngatur mayuh bengkah lumba enggau main, rekreasi enggau pekara bukai ungkup bala kaban LANDAS kena nyungkak pemanah nama Kelab LANDAS Betong.
“Pemanah nama engagu pengawa ke dikereja Landas Betong patut disungkak belama. Nya ukai semina pemujur ba atur pengawa ti duipejalaika, tang mega ngemeratka penyulut ba semua pekara.
“Kami mega deka meda semua kitai berakup sereta majak regas ba semua atur pengawa ti diatur. Nya beguna amat kena ngemujurka juluk kitai ti deka ngenegapka kaul sereta berakup dalam gerempung,” ku Anthony.
Ku Anthony, ungkup renggat 2014/2015 ini, Landas Betong ulih nempa sereta ngadaka mayuh agi orang ke ngembuan landik, nengah atur pengawa ti deka diatur.