ANDAL MENANG: Azmin (dua kiba) bela disempulang Abdul Jalil (duduk, tengah), Saifuddin (dua kanan) enggau bala ke bukai maya aum media pengudah nganjung nama ba PRK Balingian di Mukah, pagi kemari.
Sitak ke dipegai Kepala Menteri ke dulu suba pengelama 30 taun nadai ngayanka ubah, ku Azmin Ali
MUKAH: Pakatan Rayat (PR) enda semina beterabaika isu domestik tang bela mungkur isu nasional dikena matak sukung rayat maya Pengawa Bepilih Mit (PRK) Kunsil Nengeri Balingian tu.
Sapit Ketuai Parti Keadilan Rayat (PKR) Azmin Ali madah, sekumbang DUN Balingian dipegai Kepala Menteri (KM) ke suba Pehin Sri Abdul Taib Mahmud lebih 30 taun, pemansang ba menua nya mengkang enda setipak enggau pengelama nyadi pengari rayat dia.
Ketegal pekara nya ku iya, sida ari penyakal tauka rayat menua nya empu enda pechaya chalun Barisan Nasional (BN) ke baru ulih mutarka pekara nya indah Kepala Menteri empu sebedau tu nadai chara ti engkeman nyungkak pemansang dia.
“Sebengkah isu ke nyengala iya nya di Balingian nadai sekula sekondari.
“Nembiak menua nya semina nampung pelajar ngagai Mukah kitu.
“Nama kebuah lebih 30 taun DUN Balingian dipegai BN mengkang nadai sekula sekondari?,” ku iya nanya maya aum pengarang berita ditu kemari.
Dulu ari nya, iya nyempulang chalun PKR Abdul Jalil Bujang nganjung nama bediri ngarika PRK di Balingian.
Abdul Jalil deka betapi betengali alan ngelaban chalun BN Yussibnosh Balo ngerebut penuduk nya.
Kelimpah ari nya, ku Azmin, sekula primari ba DUN tu mega enda sebaka enggau menua bukai, jauh merinsa nyengkaum sekula primari ba menua asal chalun BN ba Kampung Tellian, Mukah.
Iya madah, ketegal pekara nya bisi nembiak sekula ba sekula primari nya nyau pindah ngagai sekula bukai.
“Ukai semina nya aja, pasar Balingian mega nyentuk ke diatu nadai bekal ai paip ke manah ngagai rayat dia.
“Kitai iran ati penusah baka tu tau nyadi ba sebengkah nengeri ti kaya baka Sarawak tu,” tanya iya.
Azmin mega madah, nembiak ba menua tu mega bela dibalut penanggul rama ketegal pengawa puang enda chukup diungkup ngagai raban nembiak ditu.
Pun pekara tu nyadi laban ku iya, pengawa meranakka puku ari perintah enda datai ba menua Balingian enggau Mukah lalu ngujungka nembiak enda ulih nampung pelajar ngagai tikas ke tinggi agi lalu nekul sida ngulihka batang pengawa ti menyana.
“Industri ti ditumbuh perintah nengeri ngagai menua tu ukai ngasuh rayat senang tang pungka ngenataika isu besai iya nya industri ti ngamahka rampa menua.
‘”Perintah nengeri nyentuk ke sehari tu empai mujur berundingka chara baka ni mutarka pekara nya,” pia ku iya madah.
Maya nyaut tanya pengarang berita senentang Abdul Jalil ti kala alah maya Pengawa Bepilih Nengeri (PRN) suba berebutka penuduk DUN Jepak, iya madah pekara nya ukai nekul sida milih Abdul Jalil nyadi chalun.
“Alah sekali ukai reti udah nya ila iya alah baru.
“Kami pechaya iya ulih ngambi penuduk DUN Balingian laban iya ngembuan kaul ti rat sereta manah enggau rayat ditu,” ku iya nandu.
Nyempulang jaku iya, Sekretari Besai PKR Dato Saifuddin Nasution madah, PR mega ngemeratka isu nasional laban ku iya isu nya semak enggau tuju PR.
“Isu tu bekaul enggau institusi demokrasi reform baka parlimen, kopolisian, peguam negara, institusi birokrat ti nyadi batang pelasar pejalai parti kitai.
“Tang ari penyampau baka ni kitai deka nurunka isu tu antara 10 ngagai 15 peratus,” ku iya nerang.
“Ba isu nengeri, pemansang ba menua tu enda sebela.
“Pengaya nengeri Sarawak dipedua enda nyata ba rikod perintah nengeri tu,” ku iya nampung baru.
Saifuddin mega madah, serak tu ejen parti sida lebih agi besedia tauka nyikap diri ari Pengawa Bepilih Nengeri (PRN) ke suba.
“Rayat ditu udah ‘tuai’. Sida nemu sapa ke patut dipilih nambahka sida udah nyemetak meda nama pengurang ke dibai perintah BN ngagai sida ditu,” pia ku iya.
Maya tu mega Abdul Jalil madah, iya pechaya enggau sukung rayat ba sitak DUN Balingian iya ngarap ulih ngubah pengidup sereta pengelantang pendiau rayat dia. Iya madah, rayat patut meri awak ngagai iya nyadi pengari rayat menua nya ngambika penanggul ke ditempa perintah sebedau tu ulih diputar.