KUCHING: Ruang bilik ari empat buah genturung pendiau ti kena bungkur projek tekat ai Bengoh, ke udah diau mendam ba rumah baru sida ba Sekim Pengentap Pendiau Bengoh (BRS) urung 43 km ari tu, udah ngasaika gaya pengidup ke menyana kenyau sida pindah ngagai endur nya.
Seiku peranak menua nya Sakek Rawon, 46, ari Genturung Pendiau Kampung Rejoi ke udah pindah ngagai BRS nya madah, sida diatu ulih ngasaika pengidup ke bekualiti ba palan pengentap baru nya.
“Pengidup ba BRS jauh manah ari bungkur infrastruktur enggau perengka penyambung. Orang ke enggai pindah ngagai BRS, enda lama agi enggai enda pan pindah kia laban nadai utai agi dianti sida din (menua lama), sida ulih ngasaika perengkaguna ti diasaika kami diatu (di BRS),”ku iya lebuh ke enggau betemu ba BRS.
Iya ke muka worksyop wielding mit kediri, naka ke diatu udah nerima kangau ngelekatka gril jendila enggau pintu rumah ari sida semenua dia.
Dikemansangka ba tanah ke mungkur pemesai 130 hektar enda jauh ari Genturung Pendiau Semadang ba simpang Jalai Puncak Borneo urung 20 km ari tekat ai Bengoh, BRS ngembuan 204 buah rumah ke disikap ngena ai beresi, karan, dua buah gerija, sebuah sekula primari, empat buah dewan mayuhguna enggau sebuah padang bol.
Kena meransang orang ke bedau pindah ngagai BRS nya, Sakek mantaika langgur penemu ngambika perintah nanggung ungkus perengka pengangkut ke dikena sida pindah kia.
“Pekara ke pemadu patut dikemeratka iya nya, perintah mayar pampas penuh ngagai tanah kami, ladang, pun buah, rumah enggau semua reta ti ditinggalka kami di menua asal,” ku iya.
Kena meransang semua 204 buah ruang bilik ke kena bungkur projek nya ngambika jampat agi mindahka diri, Menteri Muda Pengerai Mensia Mayuh Sarawak Datuk Dr Jerip Susil ngenukuka perintah tetap mayar pampas ngagai tanah enggau reta sida ke bukai.
Chairman Komiti Penyambung Kaul Raban Petugas Khas BRS, Itodio Peu Rayu madah, semina setengah ari ruang bilik ke patut pindah ngagai palan pengentap pendiau baru nya ari Genturung Pendiau Taba Sait, Genturung Pendiau Rejoi, Genturung Pendiau Pain/Bojong enggau Genturung Pendiau Sebemban udah mindahka diri kia.
Tekat ai nya mungkur pemesai 1,600 hektar ti ngembuan kapasiti mekal 114.1 miliun meter metrik ai kena napi peminta ke majak mayuh ari Kuching enggau Samarahan. — Bernama