BESAUP NGETANKA PENUDUK BN: Muhyiddin (empat kanan, mua) nguluka Yossibnosh (empat kiba) sereta disempulang Adenan (tiga kanan) enggau bala pemesai BN ke bukai maya ngelawa palan ngantung nama di Mukah, kemari.
Awak menang endang besai, kitai ngarapka iya ulih nyambung program pemansang KM ke dulu suba
MUKAH: Barisan Nasional (BN) pechaya udah milih pengari ke pemadu engkeman ba pengawa bepilih mit (PRK) di Balingian ditu ngambika ulih nyambung program pemansang Kepala Menteri (KM) ke dulu suba Pehin Sri Abdul Taib Mahmud di Mukah, sebengkah pelilih menua ke dibungkur Koridor Kuasa Tau Dikena Baru Sarawak (SCORE).
Sapit Menteri Besai Tan Sri Muhyiddin Yassin madah, peneleba chalun BN, Yossibnosh Balo, maya nyadi pemesai perintah sebedau tu ulih nyintalka kaul enggau rayat sereta berandauka program pemansang.
Taja pan BN dipeda ulih ngetanka penuduk nya, tang ku iya, bala pengundi patut bekerejasama nengah pengawa ngundi chalun BN tu.
“Ejen BN enda tau kelalu andal ulih menang taja kitai nemu awak nya besai,” ku iya seraya madah, ejen BN bisi pelin kediri dikena nambahka sukung pengundi.
Ngenang manifesto iya ku Muhyiddin, manifesto BN maya Pengawa Bepilih Nengeri 2011 enggau Pengawa Bepilihh Besai 2013 mengkang ulih dikena.
Ku iya, nama ke patut dititih iya nya ngamatka semua semaya ngagai rayat.
“Ulah chalun mega mai reti ke besai laban tu ukai pengawa bepilih besai lalu Sarawak dipegai BN. Semua ti disemaya kitai suba patut dikeamat,” ku iya nandu.
Berebak enggau tu mega, Kepala Menteri Sarawak Tan Sri Adenan Satem madah, ejen BN deka nerang ngagai pengundi senentang isu ke dibai penyakal.
“Kitai andal ulih ngetanka penuduk BN ditu bepelasarka rikod ti manah kenyau BN merintah ba sitak tu,” ku iya.