DIPANSIK: Sekeda ari palan zon industri Serian dipatau ejensi ke bekaul kena Hari Enam tu tadi.
KUCHING: Opis Pengerara Api enggau Penyah Penusah (BOMBA) Nengeri benung ngempuru penerang bekaul enggau penusah meletup sereta api ti ngeregau pasar Serian Hari Lima tu tadi.
Direktor opis nya, Nor Hisham Mohammad madah tiga iku saksi udah dikangau mantu pansik ke alai BOMBA benung kiruh begigaka pun penyadi penusah meletup ti ngujungka api nyadi.
Nitih penerang ari iya, perechik api ari pengawa welding nyadika kebuah penusah nya nyadi.
“Pekara ti deka ditemu kitai diatu iya nya bakani api tau ngelekai sereta kaul pansik ba chunto baja ari sebuah kedai ke bela dibungkur penusah nya,” ku iya lebuh dikerandau kemari.
Hari Lima tu tadi, 19 iku orang ke besemak enggau penusah ngenggam semengat pengudah tiga buah begunan, iya nya gudang barang, kedai perengka entukar enggau gudang ais krim rubuh ketegal gegar ari letup ba zon industri Serian.
Letup nya dipelaba nyadi ari gis ‘acetylene’ ke dikena maya welding ba gudang barang ke mega udah ngerusak lima buah begunan bukai enggau sekeda entukar ke besemak.
Maya penusah nyadi, asap tebal ulih dipeda penyauh 1KM ari pasar Serian lalu letup ke kedua kali chukup balat sereta ngujungka chermin enggau panel kacha stesyen minyak petronas nyengkaum begunan enggau rumah pechah.
Ba kaul bukai, iya netapka gudang tauka begunan ti enda ngembuan setipikit ‘Bomba’s Fire Certificate (FC)’ tau didawa ba kot.
Iya madah 20 kes udah ditemu di Sarawak naka ke diatu lalu BOMBA udah mai enam kes ngagai kot ngambika dipechara.
Orang ke ngempu begunan ke enda ngulihka setipikit FC tau diukum RM5,000 tauka jil tiga taun tauka kededua nengah Akta BOMBA 1988, tandu iya.