KUCHING: Gerempung bansa Dayak diperansang numbuhka mayuh koperasi kena nambah pemayuh ke bisi diatu.
Chairman Eksekutif Suruhanjaya Koperasi Malaysia, Dato Nik Ali Mat Yunus madah, pemayuh koperasi ke dibuka di Sarawak naka ke diatu manggai 883 buah, lalu entara sebuah menua ke ngembuan koperasi ke aktif, lalu ari penyampau nya, bisi sekeda koperasi nya ditumbuhka gerempung bansa Dayak.
“Taja pan aku nadai nemu silik penyampau tang diperatika koperasi Dayak sigi bisi lalu dipeda gerempung bansa Dayak udah nemu pemanah numbuhka koperasi,” ku iya.
Iya madah baka tu lebuh dikerandau pengudah mendingka penerang ari Chairman Koppes Tan Sri Datuk Amar Abdul Aziz Hussein enggau Direktor Koppes Abas Abu Bakar.
Iya ngelalau gerempung bansa Dayak ke bedau numbuhka koperasi tau ngepunka pengawa nya nengah ‘online’, tang gerempung nya patut ngembuan enda kurang 50 iku kaban.
“Gerempung ulih ditukar nyadi ‘enterprising’, asal ngembuan 50 iku kaban, tau minta nengah laman web kami, Suruhanjaya Koperasi Malaysia, www.skm.gov.my “Udah peminta nya diisi, iya ulih dianjung nengah ‘online’ mega, alai kami deka meri gerempung nya setipikit udah abis Aum Besai Setaun Sekali (AGM), udah nya baru ngaga modul dagang tauka perambu dagang kitai,” ku iya.
Nik Ali maya penemuai ke Sarawak, mendingka licha ari Koperasi Koppes, ke dipadahka sebuah koperasi ke ngembuan perambu pemansang, ngembuan peluang besai ngulihka untung laban chara iya diputar, digaga enggau tegut sereta ngembuan kaban pemesai ke mangku pengawa di koperasi tu orang ke mayuh peneleba ke kala gawa enggau opis perintah.
Entara aktiviti ke digaga Koppes, iya nya Taska Tadika Sayang, Palan Hemodialisis, Projek Pengaw berumah di Bako, Meranek lalu entara setipikit sereta gelar ke diulih sida, Koperasi Koppes Sarawak Berhad (Koperasi Terbaik Peringkat Negeri Sarawak taun 1995), Anugerah Tokoh Koperasi (1997), Koperasi Koppes Sarawak Berhad dipilih ngagai renggat penudi ba Kategori Anugerah Kualiti Perdana Menteri ba pampang Sektor Sosio Ekonomi (1998) enggau Koperasi Koppes Sarawak Berhad masuk lis dalam Lis 100 koperasi pengabis manah di Malaysia sereta ba penuduk lumur dua di Sarawak (2009).
Ba pekara pajak gadai nitihka syariah Islam, ‘A-Rahnu’ baruh ‘Garis Panduan 25’ (GP25), iya nya atur ‘khas’ digaga bekaul enggau penumbuh aktiviti pajak gadai Islam ke nitihka syariah Islam, Nik madah, iya dilisin nengah SKM (Suruhanjaya Koperasi Malaysia) lalu enda di ‘francais’ baka Bank Rakyat.
“Barang koperasi ke tau dibuka nitihka undang-undang mit sida iya empu, tau nguji ba pengawa dagang baru, iya nya ‘Sistem Perniagaan Pajak Gadai Islam (SPGI)’ ke nitihka ‘syariah’ Islam,” ku iya.
Naka ke diatu, di Malaysia, bisi 150 buah udah dibuka maya GP25 kena bulan March 2013 udah nyapai urung ‘turnover’ ba tikas RM600 juta.
“Lalu tu, sebengkah SPGI ke nitihka atur ‘syariah’ ke nadai nekan orang lalu nithka undang-undang Islam,” ku iya lalu nambah A’Rahnu tu nadai hak dibuka tang ke diatu SPGI koperasi nya majak nambah.
Iya madah trend baka tu majak nambah kelebih agi nitihka musin lebuh orang nya begunaka wang, iya tau ngadai perengka emas digadai chara Islam.
“Lebuh udah bisi duit, baru ngambi pulai baru…. A-Rahnu tu popular di Kelantan laban indu kami din sigi mayuh nyimpan emas.
“Nya alai kami meransang koperasi ke bisi undang-undang mit ke bisi ati deka ngereja aktiviti bekaul enggau wang sereta kredit enggau pekara wang Islam, tau numbuhka A-Rahnu lalu nitihka atur baka ke udah ditetapka,” ku iya.