Semina nengah pemandai bala nembiak ulih ngubah pengidup, ruang bilik sida sereta menua
ASAJAYA: Perintah sedia meranakka bebiliun ringgit ba pekara pelajar dikena nentuka nembiak rebak baru ke nyadi peturun peranak Malaysia nyadi nembiak ke landik sereta pintar.
Sapit Menteri Besai Datuk Patinggi Tan Sri Muhyiddin Yassin madah semina nengah pemandai, sesiku nembiak ulih ngangkatka ikas pengidup diri, ruang bilik sereta menua lalu nya udah nyata dipeda kenyau meredeka.
“Berindik enggau nya, sigi udah nyadi tanggung pengawa perintah nyendiaka awak ke besai ngagai semua ba pekara pelajar. Kitai angkun nentuka pekara tu dikemujur enggau nadai sekat.
“Nadai kebuah ba maya ke diatu anak kitai enda ulih besekula enti kitai beratika awak besekula ke disedia perintah diatu. Nadai kebuah anak kitai ngetu sekula tauka nadai kereja ketegal kurang awak ke disedia ba pekara pelajar.
“Semua udah disedia, kekadang sekula ditumbuh ba mua pintu rumah lalu disikap enggau endur bemalam sereta rumah pengajar,” ku iya.
Muhyiddin mansutka jaku tu ba pengerami Ketuai Begulai Enggau Rayat ke diatur di SMK Asajaya 2, Samarahan ditu, kemari.
Iya ke mega Menteri Pelajar madah ba taun 2014, perintah udah ngagihka RM3.6 biliun ungkup 25 bengkah program bantu besekula di serata menua.
“Jeman ke diatu, anak kitai chukup untung, sekula ditumbuh besemak enggau rumah lalu disikap enggau raban pengajar ke udah dilatih.
“Sekula mega disikap enggau atur ngajar nengah sistem teknologi kemaya hari kelimpah disedia enggau bantu bup, sekulasip, bantu pemakai sereta bantu bukai ke manggai RM3.6 biliun,” ku iya.
Iya nambah, perintah nyentukka diatu tetap berat nyendiaka infrastruktur ke pemadu manah ba sekula dikena nentuka tiap sekula ulih nyendiaka pelajar ke engkeman.
Ku iya, dikena nentuka sistem pelajar ngembuan kualiti tinggi, raban pengajar ke ngajar raban nembiak patut ngembuan kualiti ti tinggi mega.
“Enti kita deka meda anak kitai pintar ba pekara sains enggau matematik, kitai meseti nentuka pengajar ba sabjek sains enggau matematik chukup latih sereta ngembuan kualiti.
“Enti kitai deka meda anak landik bejaku Jaku Inggeris, kitai dekaka pengajar ke landik ba Jaku Inggeris.
“Lalu enti kitai deka anak kitai landik bejaku Iban, kitai dekaka pengajar ke landik dalam Jaku Iban ngambika sida ulih bejaku Iban,” ku iya seraya ti madah nadai penaggul ba jaku bukai baka Kadazan, Dusun enggau Murut.
Iya nambah, perintah udah ngagihka lebih 50 biliun ba pekara pelajar lalu penyampau nya ngarika 20 persen ari semua bajet 2014.
Ba kaul bukai, Muhyiddin setuju nganti nama SMK Asajaya 2 nyadi SMK Hajah Laila Taib nurutka peneka sereta pinta rayat enggau ketuai perintah nengeri.
Bela datai Menteri Pengatur Pengeraja Asal enggau Rampa Menua Datuk Amar Awang Tengah Ali Hassan, Menteri Pemansang Infrastruktur enggau Penyambung Datuk Dato Sri Michael Manyin, Menteri ba Opis Menteri Besai Nancy Shukeri, Menteri Muda Pemansang Nembiak Datuk Abdul Karim Hamzah, Direktor Opis Pelajar Sarawak Dato Abdillah Adam enggau kepala Pengajar SMK hajah Laila Taib Ahmad Ayub.