KUCHING: Seraban 200 iku orang ke megai batang pengarap Hindu udah begempuru besembiangka pengelikun sereta pemulai penumpang enggau raban bilun MH370 ba Kuil Sri Srinivasagar Kaliamam Temple di Jalai Ban Hock kena malam Hari Lima tu tadi.
Ku raban Komiti pengerambai kaul kuil nya, T.Ganesan madahka nya meh keterubah endar orang ke megai batang pengarap nya besembiangka nya ngagai Tuhan Ambal.
“Kami besembiangka pengelikun sereta pemulai penumpang enggau raban bilun nya, ngemataka ruang bilik penumpang enggau kru, meri terima kasih ngagai perintah menua Malaysia ti napi penusah tu sereta ngiga ngena kapal ti disaup orang berikan ba pengawa ngiga bilun ke lenyau nya,” pia ku Ganesan.
Lebuh ke besembiang nya, sida iya mega dipeda enda engkeretik dalam kandang beberapa minit.
Bilun ke diempu Malaysia MH370 udah lenyau kena Hari Enam minggu seiti nyin tadi dalam penerebai ari Kuala Lumpur nuju ke Beijing. Lebuh ke lenyau, bilun nya mai 239 iku penumpang enggau kru.
Dua ari tiga bagi, 227 iku penumpang bilun nya peranak menua China, lalu sekeda nya penumpang ari sekeda menua Asia, Amerika utara tauka Eropah. Bilun nya mega mai 12 iku kru semua peranak menua Malaysia.