SRI AMAN: Bala nembiak diperansang regas dalam bidang ko-kurikulum ke sebaka pemerat enggau akedemik.
Kaban Parlimen Sri Aman Masir Kujat madahka,bala nembiak endang diperansang belajar bebendar ngambika nyulut dalam pelajar,taja pia sida mega enda tau enda malutka diri dalam ko-kurikulum baka ti udah ditetapka sekula.
“Pelajar nya meh nentuka gaya pengidup sida dudi ila, taja pia sida enda tau enda regas dalam ko-kurikulum, baka masuk ba lumba enggau main sereta gerempung,” ku iya.
“Nadai jalai mudah bulih pemujur kelimpah ari ngeregaska diri belama dalam kededua bidang nya, ngambika ulih nyapai juluk ati diri empu, diri sebilik enggau sekula.
Iya bejaku munyi tu lebuh bejadika Program Milih Atlet, Sekula Sekondari (SMK) Melugu ba padang sekula nya ditu kemari.
Ku iya, polisi pelajar menua Malaysia endang minta kita chakah agi gawa ngerembaika pengelandik sesiku ngambi tetempaka mensia ti ngembuan pengelandik ari segi runding, pemanah ulah enggau fizikal.
“Tiap buah sekula di Malaysia tu endang ngembuan juluk deka nempa nembiak ke pandai, ngembuan pemai diri ke manah, manah ulah, bisi tanggungpengawa sereta ulih ngumujurka pengidup diri empu seraya nyaup mai pengelantang ngagai mensia mayuh,” pia ku iya.
Ku iya baru, ngambika setipak enggau polisi pelajar menua Malaysia, perintah deka meda bala nembiak belajar nyentuk ke tikas Universiti lalu nangkan ke nya ngembuan pengawa ti manah.
“Enti deka nampung pelajar nyentuk ke tikas ti pemadu tinggi, pemujur ke diulih bala nembiak ukai semina diperatika ari pemujur dalam akedemik aja, tang mega bidang ko-kurikulum,” ku iya.
“Ukai mudah bala nembiak teulihka pemujur dalam kededua bidang nya, tang enti sida liat ati sereta chakah, sida tetap teulihka pemujur,” pia ku iya.
Bela bisi ngulu program nya, Prinsipal Sekula SMK Melugu, Jamit Ajok, Pemantu Masir, Edmund Pirang enggau bala pengajar kanan bukai.
Beserimbai enggau program nya, Masir udah ngungkupka belanja RM5,000 ngagai Gerempung Apai Indai enggau Pengajar (PIBG) sekula nya, ngambika bisi dikena sida bejalaika atur pengawa nya.