KUCHING: Mandal Presiden Parti Keadilan Rakyat (PKR) Negeri See Chee How ngarapka Sapit Menteri Besai (TPM) Tan Sri Muhyiddin Yassin enggau lengkas madahka haribulan ngaga sekula sekondari di Balingian.
Nitihku iya, ngaga sekula sekondari di kandang menua nya endang danji maya pengawa bepilih nengeri enggau parlimen suba.
“Senutuk enggau penemuai iya (Muhyiddin) ke Mukah ti deka mantaika nama chalun Barisan Nasional (BN) Pengawa Bepilih Mit (PRK) Kunsil Nengeri (DUN) Balingian, iya ti nyadi Menteri Pelajar amat patut nentuka kemaya haribulan ngaga sekula sekondari di Balingian.
“Sekula sekondari di Balingian endang diungkupka sida ke dia (Balingian) lalu aku ngarapka Muhyiddin ulih ngamatka semaya,” ku iya dalam aum pengarang berita ditu, kemari.
Iya ti mega Kaban Kunsil Nengeri (ADUN) Batu Lintang madah, nembiak ari Balingian bisi sekula di Mukah ti urung penyauh 60 kilometer.
Nambahka nya See madahka Balingian agi betapi enggau penanggul suntuk bekal ai.
Nitihku iya, ‘gula-gula’ deka berengkah disadung ngagai peranak Balingian dikena nentuka BN menang ba sitak nya.
Nya nyengkaum meri geran tanah enggau ngemendarka peminta tanah ti nyerangkung 530 lot ti diberi iya nya di Kampung Litong, Kampung Bunut, Kampung Teh, Kampung Teh Labak enggau Kampung Sungai Alo, semua nya di Mukah.
Lalu bisi 151 peminta tanah dikemendarka ba sebengkah pengerami kena 11 Mac tu tadi.
Nitihku See, peranak di genturung pendiau nya ngelama tu nadai geran tanah taja pan udah beberapa serak udah diau dia.