Anda di sini

PERKESO ngerikut 63 kes pengaji dikompaun, 20 didawa ba kot

Advertisement

KUCHING: Sepemanjai bulan Januari ngagai Disember 2013 Gerempung Penyaga Pengelikun Mensia Mayuh (PERKESO) bisi ngerikut 63 kes pengaji dikompaun ketegal enda ngerejista nama pengereja pengawa enggau 20 kes pengaji didawa laban enda mayar duit simpan pengereja pengawa nitih ti udah ditimpuhka.

Direktor PERKESO Nengeri Sarawak, John Riba Marin madah, tebal agi ti kena kompaun nya asil ari pengawa Ops Kesan ti dipejalaika PERKESO kelimpah ari ti nerima riput ari pengereja pengawa.

“Kami deka mansik pengamat riput, lalu enti betul kami deka ngeluarka kompaun ngagai pengaji ti ditemu enda ngerejista tauka enda mayar duit simpan orang ti gawa.

“Enti ditemu salah ngelaban adat sereta undang-undang ulih didawa ngagai kot, tau ditinggang adat lalu diukum mata duit enda lebih ari RM10,000 tauka ukum jil enda tauka lebih ari dua taun,  tauka kededua ukum nya sekali.

“Tebal agi pengaji ti kena kompaun nya asil ari ‘Ops Kesan’. Penyalah pengaji enda mayar duit simpan orang ke gawa enggau laun mayar ti ngujungka kena ukum Faedah Caruman Lewat Bayar (FCLB),” ku iya.

John dikerandau pengarang berita pengudah ninga licha Anugerah Hari Pekerja 2014 ti diatur ba Wisma PERKESO ditu, pagi kemari.

Beduduk ari pekara  nya iya ngelalau orang gawa ti nemu pengaji enda mayar duit simpan nya patut ngeriput ngagai PERKESO sereta pengaji patut bejalaika pengawa beratka pengelikun nengah chara mayar duit simpan orang gawa.

PERKESO udah ditumbuhka dalam taun 1971, ti bejalai sereta nerit ke adat ti dikumbai “Akta Keselamatan Sosial Pekerja, 1969, enggau “Peraturan-peraturan (Am) Keselamatan Sosial Pekerja 1971.

“PERKESO nyendiaka atur nyaga sereta meri pengelikun ngagai semua pengereja pengawa enggau orang ke disangkung iya ari sebarang penusah bebadi lebuh gawa, tauka bisi ngenatka pemedis tauka penyakit,” ku iya.

Kelimpah ari nya, opis PERKESO mega bisi bejalaika tanggungpengawa meri penemu enggau peransang pasal pengelikun ba alai gawa ngagai semua pengereja pengawa sereta pengaji.

Pengereja pengawa ulih meresa nengah websait PERKESO iya nya www.perkeso.gov.my dikena nentuka sekalika pengaji bisi mayar duit simpan tauka nadai sereta ulih datai ngagai opis PERKESO ke semak.

“Maya ngagai opis PERKESO, kad pengelala tauka MyKad enda tau enda dibai laban kami bepelasarka lumur MyKad kita,” ku John.

Advertisement