MIRI: Lebih 400 iku temuai dipelaba deka ngulu Pengerami Malam Gelar Nyulut Ba Pelajar Gerempung Dayak Bidayuh (DBNA) Miri ke diatur malam tu, (15 March).
Ku Sekretari DBNA Miri Caroline Siburat, sida udah nerima tujuh iku chalun penerima ungkup UPSR, PMR (9) enggau SPM (1).
“Kami mengkang ngiga chalun penerima sereta meransang raban bansa Bidayuh ditu nganjung nama sida ke nyulut ba peresa perintah.
Ku iya, gelar nya dibuka ngagai semua nembiak ti teulihka semua A ba peresa UPSR enggau PMR, 9A ungkup SPM lalu 4Ps STPM, pemadu nadai bulih A tauka B dalam semua sabjek.
Berambaika leka jaku ‘Empowering Community Through Education,’ pengerami nya deka diatur ba Eastwood Valley Golf & Country Club.
Menteri Pemansang Infrastruktur enggau Penyambung, Dato Sri Michael Manyin Jawong disadang nyadi temuai ti dipebasa sereta bejadi pengerami nya.
Gelar nya ukai semina dikena ngaku sereta gaga ati ke penyulut nembiak bansa Bidayuh aja, tang mega kena meri peransang ngagai sida ngambika chakah agi ba pelajar.
Nya mega deka nyadika pelasar dikena nyungkak penemu bala nembiak rebak baru sentang pemesai guna pelajar.
Kelimpah ari gelar penyulut dalam pelajar, raban pengatur pengawa mega deka ngaku sereta gaga ati ke penyulut raban graduet ari bansa Bidayuh di Miri ke udah nembuka pelajar sida ari taun 2012 enggau 2013.
Main bukai ti deka dibantai malam nya baka mantaika main asal, tebah gong ari bala nembiak indu Bidayuh, tiket benasit enggau tanda ‘Belangi’ ari bala temuai ti dikangauka datai malam nya.