SRI AMAN: Pengawa belajar nya sebengkah pekara ke dinamik sereta seruran berubah, pia ku Menteri Muda Pemansang Menua Pesisir enggau Pengawa Berumah Sarawak, Datuk Francis Harden Hollis.
Ku iya, raban sekula patut ngiga chara dikena nyungkak pengelandik nembiak kelebih agi ba pemanah ulah kelimpah ari nyulut dalam bidang akedemik.
Ku iya, bala nembiak patut malut diri ba mayuh bengkah atur pengawa ngambika sida teulihka sekeda pekara ke beguna baka disiplin diri,tau nyadi ketuai,pemanah ulah, landik bejaku, bedagang, landik nengkebang sereta nguna chara baru.
“Nya mega ulih nempa sereta nyendiaka nembiak ngambi tetapika peminta ba pengawa puang ke diatu.
“Pengelandik bejaku patut diiri ngagai tiap iku bala nembiak ngambika sida ngembuan teknik-teknik bejaku kena ngisi peluang ba pengawa puang,” ku iya.
Iya ke mega Kaban Kunsil Nengeri (ADUN) Simanggang bejaku munyi tu nengah teks jaku iya ke dibacha Tuai Kunsil Opis Pelilih Sri Aman (MDSA), Richard Tawan Sedu lebuh ti ngarika iya bejadika Pengerami Nutup Program ‘Seminar Kerjaya’ ke diatur Opis Hal Ehal Khas (JASA) Sarawak Sri Aman begempung enggau Sekula Sekondari (SMK) Simanggang ba Dewan Rafflesia sekula nya ditu kemari.
Ku iya baru, penalam penemu pasal pengawa ke deka dikereja pengudah nembuka pelajar patut dikemayuh, ngambika bala nembiak nemu sentang pekara tu.
“Pengawa ke manah deka meri pengelantang ba pengidup jemah ila.
“Taja pia, bala nembiak anang semina ngarapka bantu ari sekula aja sebedau teulihka pengawa, tang sida patut nemu utai ke deka diguna enggau gaya pengidup ke amat lebuh sida udah gawa ila,”ku iya.
Berebak enggau nya, kita (nembiak) patut seruran nambahka penemu ba bidang ke bekaul, nemu kuing pengawa ti dikinginka sereta merambu chara nyungkak penyulut enggau pemujur lebuh ke gawa ila.
Seraban 400 iku nembiak enggau pengajar udah ngulu seminar ti nyendiaka lalau ngagai bala nembiak ke udah ngambi peresa Sijil Pelajaran Malaysia (SPM) enggau Sijil Tinggi Pelajaran Malaysia (STPM), kena milih kus ke bisi ba palan pelajar tinggi sereta peluang gawa ke setipak enggau pemutus akademik, pengerindu seraya nyendiaka diri napi interviu. Sida mega patut ngelala pengelebih diri ke ulih nyaup sida milih pengawa ke pemadu engkeman ba sida.
Beserimbai enggau pengerami nya, Harden ngungkupka geran ari perintah RM 10,000 ngagai sekula nya lalu RM 5,000 ngagai JASA Sri Aman, ngambika bisi dikena sida bejalaika pengawa sepemanjai taun.