Anda di sini

Pemesai BR1M dipinta bekerejasama enggau rayat

Advertisement

MIRI: Pemesai perintah bekaul enggau pengawa nyadung Bantu Rayat 1Malaysia (BR1M) dipinta nerangka enggau manah senentang penanggul ke nuntung rayat ketegal ari bantu nya.

Kaban Kunsil Nengeri (ADUN) Telang Usan Dennis Ngau Jok madah, peranak kelebih agi ke diau ba menua pesisir kekadang pulai enggau ati ti enda lantang.

“Aku minta kerejasama pemesai perintah ke bekaul nerang ngagai rayat ke bisi sekeda nya udah datai jauh betanyaka pekara senentang BR1M,” ku iya madah ngagai Utusan Borneo, apin lama ke udah.

Iya mantaika penemu nya bekaul enggau sekeda penanggul senentang BR1M iya nya ke bedau ditukuka ulih nerima bantu nya, ukai semina orang ke patut nerima enggau sekeda penanggul ke bukai.

“Arapka ulih meri pom apil enti nama sida nadai dalam lis nyadi penerima lalu ungkup sida ke nerima bantu enda nitihka pematut, arapka raban pemesai nya ulih madah nama pekara ke patut diaduka nangkanka nya,” ku iya.

Dennis mantaika penerang tu ketegal nerima serabana ari peranak ke betapi enggau penanggul ke sama.

“Kita patut nemu, sida (peranak) bisi nya datai jauh ari ulu entigis tauka menua pesisir lalu maya datai ba Opis Pengumpul Chukai Nengeri (LHDN) tauka opis pelilih mit, sida nadai nerima timbal ke manah bekaul enggau pekara nya,” ku tandu iya.

Kelebih agi enti sida patut nerima bantu nya tang nadai dalam lis nerima bantu nya.

“Kitai enggai BR1M ke tau bendar mai pengaga ati betukar nyadi pekara ti ngemediska ati,” ku Dennis.

Berebak enggau nya, iya ngelalau peranak ke diau ba menua pesisir minta bantu ari kaban belayan ke besemak enggau opis ke bekaul ngambika meresa nama sida bisi ke enda dalam lis nerima bantu BR1M renggat keterubah nya.

Ku iya, rayat mega tau nganti dulu nyangka nama sida diliska dalam penerima BR1M renggat kedua enti nadai dilis dalam renggat keterubah tu.

Advertisement