KUALA LUMPUR: Malaysia nadai nerima sebarang penerang bekaul enggau bilun Malaysia Airlines (MAS) MH370 ke lebang dipelabaka labuh ba Tasik Hindi nitihka riput media antarabansa.
“Raban antarabansa benung bebendar meri penerang ke silik nya, tang kami (naka ke berita tu ditulis) enda ulih madah laban bedau nyemetak sereta terang,” ku Menteri Ngetan Menua ke mega Pemangku Menteri Pengangkut Datuk Seri Hishammuddin Tun Hussein.
Iya madah munyi nya nimbal riput bilun MH370 dipelabaka labuh ba Tasik Hindi ketegal kapal Amerika Syarikat benung ngiga bilun nya ngelingi tasik nya.
“Nitihka penemu aku bepelasarka penerang ke baru ke enda tentu tegap, siti palan baru udah ditemu endur begigaka bilun nya iya nya ba Tasik Hindi,” ku tukang pengerembai berita White House Jay Carney baka ke diriputka ijinsi berita Perancis, AFP.
Penerebai bilun MAS MH370 mai 227 penumpang enggau 12 kru, lebang lebuh penerebai ari Kuala Lumpur ke Beijing urung sejam pengudah bekejang ari Padang Bilun Antarabansa Kuala Lumpur (KLIA) kena ke pukul 12.41 pagi Hari Enam tu tadi.
Enti nitihka bilun nya sangkai ba padang bilun Beijing kena ke pukul 6.30 pagi ba hari ke sama. — Bernama