LIMBANG: Polis udah nangkap sepasang laki bini dikandang endur paking kerita di sebuah begunan Jalai Tarap ditu lalu ngerampas 15.31 gram ecstacy enggau 7.67 gram ganja berega RM2,410 apin lama tu tadi.
Kepala Polis Limbang Superitenden Mohd Bukhori Saffai madahka operasi digaga jam 11.10 pagi oleh polis ari Indu Opis Polis diketuaika Inspektor Mohd Hasri Othman ari raban Bagi Narkotik Pelilih Limbang.
“Kededua saspek laki indu umur 31 taun, bansa China enggau bini iya umur 28 bansa Iban, orang asal ditangkap di kandang endur paking kerita sebuah begunan Jalai Tarap asil padah mensia mayuh,” ku iya, apin lama tu tadi.
Mohd Bukhori madah baru asil peresa polis nemu 11 leka pil dipelabaka pil ecstacy dalam beg sandik ke disandik saspek lelaki nya.
“Saspek udah nya mai kami ngagai sebuah rumah di Taman Pertama ngujungka ngerampas 31 leka pil ecstacy enggau sepeket tepung ecstacy.
“Kami mega ngerampas tujuh paket plastik ngundan utai tumbuh diperangkai dipelabaka dadah bansa ganja,” ku iya baru.
Iya madahka peresa ai kemi ba atas seduai nya negatif mega nadai ngembuan rikut ngereja pengawa salah.
“Kededua saspek ditan lalu kes nya deka ditasat di baruh Seksyen 39 A (1), Seksyen 12 (2) enggau Seksyen 6 Akta Dadah Berbahaya 1952,” ku iya.