Anda di sini

Kaban indu SIDS Sibu diperansang belajar kuntau

Advertisement

SIBU: Kelab Kuntau Lang Nginau Gerempung Dayak Sarawak (SDNU) Pampang Sibu keterubah iya ditumbuh ba sitak tu dikena ngetanka main asal bansa Iban.

Chairman gerempung nya Barieng Balai (gambar) madah, gerempung sida ti ditumbuh pun taun tu tadi udah mujur ngajar kuntau ngagai 15 iku nembiak.

“Tang taja pan baka nya naka ke diatu kitai semina deka ngajar raban ari SDNU Sibu aja lalu empai bisi perambu deka ngajar kuntau ngagai orang luar,” ku iya madah ngagai pengarang berita, kemari.

Iya madah, ba renggat keterubah, pengawa belajar kuntau sida berengkah kena 7 Februari lalu udah tamat kena 23 Februari tu tadi.

Ku iya, ba renggat kedua, pengawa belajar deka belabuh kena 21 Mac ti deka datai.

“Serak tu kitai mega muka awak ngagai sida ke indu ari Sarakup Indu Dayak Sarawak (SIDS) Pampang Sibu.

“Sida ke deka enggau belajar kuntau enda ditatak umur,” ku iya sambil madah kuntau deka diajar guro Tubu Anak Radin.

Barieng madah, bayar enggau belajar iya nya RM70 seiku ti nyengkaum dua iti tauka lebih bansa bungai kuntau.

Naka ke diatu mega, pengawa belajar kuntau nya diatur ba Opis SDNU Sibu enggau SIDS Sibu di Jalai Wong King Huo ditu ninting hari Lima enggau hari Enam berengkah ari pukul 7 ngagai 9 lemai lalu hari Minggu berengkah pukul 2 lemai ngagai 8 lemai.

Raban SDNU Sibu enggau SIDS Sibu ke bisi ati deka belajar kuntau tau betelefon ngagai Barieng nengah lumur 013-8107234.

Advertisement