TELANG USAN: Kaban gerija kelebih agi gerija Borneo Evangelical Mission (BEM) di Sarawak enda tau enda ngenukuka sida semampai beserakup dalam semua pengawa.
Kaban Kunsil Nengeri (ADUN) Telang Usan Dennis Ngau Jok madah, tu ngambika jaku penerang ke enda betul enda malut runding sida.
“Penyerakup ba raban kitai ulih mai pengelikun enggau pengelantang dalam pengidup,” ku iya ba sebengkah penemuai ngagai pengentap pendiau Penan di Long Iman.
Menua ke likun ku iya ukai semina datai ari penyerakup dalam pengarap enggau bansa tang mega patut dijaga sereta diintu ba dalam sesebengkah komuniti.
Ku iya asal ari sebengkah komuniti mit, Orang Ulu enda tau enda beserakup enggau pangan diri ke penegap bansa.
“Kitai patut beserakup ngambika enda muntang nerima jaku asut ke enggai meda kitai maju dalam pengidup,” ku tandu iya.
Bekaul enggau pengelebang bilun Sistem Penerebai Malaysia (MAS) ke nuju ngagai Beijing ari Padang Bilun Antarabansa Kuala Lumpur (KLIA) kena 8 Mac tu tadi ke mengkang lebang, iya minta peranak menua nya besampi ke pengelikun orang nepan sereta kru bilun nya.
“Aram meh kitai besampi ngambika semua orang ke nepan sereta bala kru bilun nya selamat magang,” ku Dennis.
Sebedau nya, Dennis mega bisi nemuai ngagai palan pengentap pendiau Penan di Long Leng ninga penanggul ke bisi ditapi peranak dia.
Ba hari kedua penemuai, iya nyerahka duit bantu perintah nengeri ngagai gerija sepenyampau RM 7,000.
Bisi datai ba pengerami nyuaka bantu nya ketuai genturung pendiau Long Iman Esak Tu’o.