KUCHING: Parti Keadilan Rakyat (PKR) deka mantaika nama chalun ngarika parti nya ba Pengawa Bepilih Mit (PRK) Dewan Undangan Negeri (DUN) Balingian, Hari Enam tu pengudah aum di Sibu.
Taja pia, Chairman PKR Negeri, Baru Bian bedau deka mantaika nama chalun PKR nyentuk ke Barisan Nasional (BN) dulu mantaika nama chalun sida.
“Naka ke diatu manah agi aku enda mantaika identiti chalun ti deka disabung PKR maya PRK DUN Balingian 29 March tu.
“Kami udah bisi tiga iku chalun ke tau ngarika parti, dua iku bansa Melanau ke mega peranak asal Mukah lalu seiku agi chalun ari menua bukai,” ku iya lebuh dikerandau Utusan Borneo kemari.
Ditanya senentang pemutus BN ti deka nyabung chalun Melanau Keristin, Baru madah pemutus nya entara sekeda pelin kededua parti ti deka nguasa DUN Balingian.
“Ba runding aku, pemutus BN nya nyadika sebengkah pelin ti patut diperunding PKR enggau silik lebih agi ba pengawa nentuka chalun PKR.
“Kitai deka nganti sapa bagi chalun ke deka disabung BN Hari Enam tu, udah nya PKR deka nentuka chalun ti patut nyatup ke alai semua pekara deka diperunding ngambika kitai ulih ngerampas penuduk nya ari BN,” ku iya.
Baru ngelama ke udah enda nyangkal pedis ungkup PKR nyatup BN ba PRK DUN Balingian ketegal penuduk nya udah nyadi kubu kuat Parti Pesaka Bumiputera Bersatu (PBB) sereta BN.
Ba pengawa Bepilih Nengeri 2011, Pehin Sri Abdul Taib Mahmud ari PBB menang nengah majoriti 5,154 undi ngalahka chalun PKR Suriati Abdullah enggau Datuk Salleh Jafaruddin (chalun ngatika diri).
Penuduk DUN Balingian puang pengudah Taib ngelengka pangku pengawa nyadi Kepala Menteri lalu dichiri nyadi Tuai Pemegai Menua ke-7 kena 28 Februari tu tadi. DUN Balingian bisi 13,366 iku pengundi berijista ka tau ngundi ke alai ari penyampau nya 133 orang ngundi tumu.
Komiti Pengawa Bepilih (SPR) udah netapka PRK Balingian diatur kena 29 March lalu hari ngantung nama chalun ditetap kena 17 March.