Anda di sini

Seraya bejadika UPMKB, Sultan Sharafuddin Idris ngelawa Taman Negara Similajau

Advertisement

PENATAI KAYU BINTANGOR: Ali (kiba) nyerita mimit seraya nerangka asal penatai kayu Bintangor ke bisi tumbuh ba Taman Negara nya.

BINTULU: Taman Negara Similajau (SNP) di Bintulu diberi basa ngelaluka penatai temuai DiRaja lebuh Sultan Selangor Sultan Sharafuddin Idris Shah Alhaj Ibni Almarhum Sultan Salahuddin Abdul Aziz Shah Alhaj ngelawa taman nya enggau raban iya.

Tu sebengkah ari program penemuai iya pengudah bejadika Universiti Putra Malaysia Kampus Bintulu (UPMKB) seraya nyadi chanselor ba hari ke dulu ari nya.

Penemuai ngagai taman negara nya berengkah ba pengawa mendingka jaku gerah ke dibantai seiku pemesai ari Sarawak Forestry Corporation (SFC).

Pengudah mendingka jaku gerah nya, Sultan lalu ngelawa bansal penerang ke alai iya mending jaku gerah sekali agi ari Dekan Prof Dr Japar Sidik ba tanggungpengaw ke dipejalaika UPMKB ngagai mayuh bengkah progam pansik enggau pemansang.

Temuai DiRaja udah nya ngepunka pejalai sida ngagai tapak tinjau nengah trek pejalai kaki dalam pengelama urung setengah jam.

Ba rantu jalai, Sultan Sharafuddin diberi penerang ke nenak bekaul enggau bansa utai tumbuh di Taman Negara nya ulih Menijing Direktor ke mega Pemesai Kepala Eksekutif SFC, Datu Ali Yusop.

Maya ngetu enda lama ba tapak tinjau urung 20 minit, Sultan enggau raban iya beperindang meda pemanah enggau pemaik rampa menua.

Bela bisi enggau dia Menteri Pemerambu Pengeraja Asal enggau Rampa Menua Kedua Datuk Amar Awang Tengah Ali Hasan, Speaker Kaunsil Nengeri Datuk Amar Mohamad Asfia Awang Nasar, Menteri Muda Perengka Guna Rama (Bekal Lekterik enggau Penyambung) Datuk Dr Stephen Rundi Utom, Menteri Muda Dagang Temuai Datuk Talib Zulpilip enggau Dekan Fakulti Agrikultural enggau Sains Pemakai UPMKB, Profesor Dr Japar Sidik Bujang.

BEGULAI NERESA: Sultan Sharafuddin nguluka raban iya niti jematan gantung neresa kampung ba Taman Negara Similajau.

Advertisement