Seraya ngenataika pengaga ati, gerempung tu arapka tabur pemansang dikerembai ke peranak menua pesisir
KUCHING: Gerempung Bansa Dayak Sarawak (SDNU) madahka pengandal ati beduduk ari Tan Sri Adenan Satem ke udah dichiri nyadi Kepala Menteri Sarawak ke-5, lalu diberi ex-Kepala Menteri Pehin Sri Abdul Taib Mahmud kuasa penuh maya mangku pengawa nya kena 28 Februari tu tadi.
Mandal Presiden I SDNU Anthony Banyan madah, SDNU manggaika pengadal ati ngagai Adenan nyadi Kepala Menteri ke baru lalu deka terus ngiring sereta nambahka pemansang di serata menua Sarawak lalu enda ninggalka peminta tauka penemu genap raban bansa lebih agi rayat di menua pesisir.
“Terima kasih ngagai Allah Taala laban ti meri pengelikun ke semua raban bansa kitai di Sarawak kenyau ari taun 80 menya, ti meri peluang alai bala tuai menua ti betuaika Pehin Sri Taib ngatur sekeda pemansang fizikal, pelajar, ekonomi kelimpah ari jalai pengarap, mental, adat pesaka, lumba enggau main enggau sekeda pekara bukai.
“Kami di SDNU mega ngarapka Adenan deka mutarka sekeda penanggul ti besangkut paut enggau tanah NCR, penanggul pengarap, isu sama peluang niki pangkat pengereja pengawa sereta pangku nyadi direktor ba opis perintah tauka nyadi chairman ba ejensi perintah tauka kompeni ke bisi besangkut paut enggau perintah (GLC) ke semua raban bansa,” ku Anthony.
Iya madah munyi tu ba e-mel ke dikirum iya ngagai Bilik Berita lebuh dikerandau bekaul enggau penemu SDNU dalam pengawa Adenan ke dichiri nyadi Kepala Menteri.
Iya nambah, SDNU mega bisi pengarap ti besai ngagai Adenan bebagika pemansang ti besai, lalu ukai semina ba sebengkah dua endur aja tang di beri di serata nengeri Sarawak, awakka meri peluang ngagai semua raban bansa ngangkat tauka ampit ba aktiviti ekonomi enggau tikas pengelantang pendiau semua rayat.
“Ba pemansang peluang belajar, arapka Kepala Menteri berundingka bagi ungkup sskolarship baka Yayasan Sarawak, sama rata ngagai nembiak ti patut nampung pelajar ngagai semua raban bansa. Pia mega meri peluang semua raban bansa diambi nyadi chairman/pemesai/orang gawa ba semua opis baka Yayasan Sarawak, SEDC, Pelita, Unimas enggau sekeda ejensi perintah bukai.
Kelimpah ari nya mega, ngarapka Adenan ulih ngenatai ngagai sida ke bekuasa, Sarawak tu diuan mayuh raban bansa, nya alai ngaga Sarawak betul-betul empu semua bansa sereta ngaga tanda, kelai tauka nama jalai, jematan, dewan, sekula diberi ngangkatka nama Dayak.
“Ambika chunto, kena ngingatka pengawa tuai bansa Iban, pengawa sida iya ngelama tu ba Politik Dayak, ti kala nyadi Menteri Kerjaraya Malaysia, Menteri Telekomunikasyen Malaysia, Presiden Gerempung Dewan Dagang Dayak (DCCI) nyengkaum megai pangku pengawa nyadi chairman Tenaga Nasional Berhad, ti datai ari Batang Rajang, meri nama Jematan Durin nya nyadi Jambatan Tan Sri Datuk Amar Leo Moggie,” ku iya.
Kelimpah ari nya, SDNU ngarapka sabjek Jaku Iban ke nyadi sebengkah matapelajar di Universiti Pendidikan Sultan Idris (UPSI) di Tanjung Malim, Perak tau mega nyadi sabjek elektif di universiti di menua tu empu baka ba UNIMAS, UiTM Sarawak enggau UPM Bintulu.
“Kami mega ngarapka rayat menua pesisir nerima berita pemansang menua ti sebaka enggau rakyat di mengeri, nya alai minta tabur berita WaiFm/TV Jaku Iban ulih dikerembai ngagai serata menua Sarawak ari pagi ngagai malam ngambika mayuh peluang alai kitai tauka perintah bekunsi, naburka berita pemansang pengawa rama, ekonomi, dagang, industri, pelajar, lumba enggau main tauka berita pemansang politik ngagai rayat.
“Kelimpah ari nya, bala artis Dayak tau diperunding, dibayar ‘Royalty’ ba pengawa belagu, bepantun, melandai, beganu, nimang, bebiau lalu pia mega Pantun Bulan niang Aki Dunging ti seruran pansut ninting pagi.