Anda di sini

Pejah, petenah bejaika perintah patut disukung penerang ti menuku, ku Will

Advertisement

MARUDI: Orang ke mantah sereta bepetenahka penyai pengawa, projek tauka polisi ti dipejalaika perintah patut ngembuan penerang ke chukup sebedau mansutka penemu.

Sekretari Politik Kepala Menteri, Richard Wil madah, enda salah enti sema rayat deka mantah sentang sesebengkah pekara tang sida patut ngembuan penerang ke chukup, ukai baka penyakal ke mantah nyauka semua polisi enggau projek pemansang, taja pan bisi mai penguntung ngagai rayat.

“Enti kita masuk politik ketegal deka mantah, tentuka dulu pekara ti patut dibantah, anang mantah sengapa baka penyakal ke mantah semua perambu enggau projek pemansang perintah nyentuk ke bisi sekeda projek nya enda ulih dipejalai taja pan meri penguntung enggau pemaik ngagai rayat nyengkaum penyakal empu,” pia ku iya.

Ku Richard, ketegal deka mantah mih kebuah sekeda rayat lebih agi bansa Dayak deka masuk politik.

Kedua, laban deka mai pemansang ngagai rayat, sekalika ba kandang megeri tauka menua pesisir nengah parti politik perintah ke ari baruh pegai Barisan Nasional (BN).

Richard mega seiku ari veteran politik bansa Iban di menua tu madah, iya empu kala nyakal lebuh agi enggau Parti Bansa Dayak Sarawak (PBDS) ngelama sembilan tahun sebedau parti nya dikinsil, ke alai iya masuk parti komponen BN.

“Ngelama ke nyakal dalam kandang semilan taun, kami semina nemu nyakal sereta mantah semua utai ke diberi perintah.

“Enti bisi pekara ke mit, kami ngemesaika nya ngambika ulih nyadi sebengkah publisiti ke murah nyengkaum penanggul parit, nadai tung uras enggau sekeda pekara bukai. Nya ukai deka ngeringka rayat tang kami dipuji mensia mayuh ketegal berani bejaku. Semua nya ulah ke betul.

“Diatu bebida enggau kelia laban mensia diatu majak landik bepolitik sereta nemu parti ke patut dititihka sida,” ku iya bejaku ba Pengerami Ketuai Begulai enggau Rayat sereta Nasih Taba rumah panjai TR Merikan Tadong, di Lobang Kompeni ditu.

Nengah awak nya mega iya ngelalau bala pengundi ba kandang menua Poyut/Lubok Nibong enggau sitak Telang Usan ngambika seruran meri sukung ke tegap ngagai BN enggau pengari rayat sitak nya (ADUN Marudi), Datuk Sylvester Entri enggau ADUN Telang Usan, Dennis Ngau.

“Kededua pengari rayat nya bagas gawa ke rayat  ba kededua sitak DUN di Baram nya. Anang ngumbai perintah nadai meri pemansang taja pan perintah udah mayuh ngaga jalai alun ke manah agi,” ku iya.

Pengerami nya udah dipenyadika Kaban Kunsil Nengeri Telang Usan, Dennis Ngau sereta digulu bala ketuai raban bansa ba kandang menua nya nyengkaum Temenggung Atong Limping, seiku ketuai bansa Iban di Pelilih Miri.

Advertisement