GERAH JARI: Dr Abdul Rauf (tiga kiba) ngelekatka menira keretas PBSM ba baju Adenan seraya dikemataka sida bukai.
KUCHING: Gerempung Anak Bulan Mirah Malaysia (PBSM) Pampang Kuching nagit teulihka RM40,000 ari pengawa bejualka menira kertas PBSM taun 2014, nyerumba ‘Hari Bendera’.
Pengawa bejualka menira kertas PBSM renggat Pampang Kuching udah dipenyadika Kepala Menteri Tan Sri Datuk Amar Adenan Satem, ba opis iya di Wisma Bapa Malaysia ditu, kemari.
Mandal Chairman sereta Chairman komiti mit Pengatur Pengawa ‘Fund Raising’ nya, Titus Chuo madah, pengawa bejual menira kertas PBSM ngagai mensia mayuh dipejalaika dalam timpuh dua minggu.
Iya madah, bejualka menira kertas nya endang pengawa tiap taun PBSM.
“Taun tu kami nagit RM40,000 asil ari pengawa bejual menira kertas PBSM, nya berindik ari taun nyin kemari (2013) kami tegumpulka lebih RM30,000.
“Semua kaban PBSM renggat sekula Primari enggau Sekondari dalam timpuh dua minggu tu ila, berengkah seharitu (kemari) deka nyual menira kertas nya ngagai mensia mayuh, lalu kami ngarapka sukung ari mensia mayuh di luar dia,” ku iya lebuh dikerandau pengarang berita pengudah bejadika pengawa bejual menira nya.
Tuju pengawa bejualka menira kertas nya dikena nempa tauka ngelatih rebak baru nulung raban bansa kelimpah ari dikena ngiga belanja gerempung.
Kelimpah ari bejualka menira kertas, PBSM Pampang Kuching mega bisi ngatur pelanda enggau pengawa meri darah ke mega pengawa diatur ninting taun.
“Tiga pengawa tauka aktiviti ninting taun ke diatur kami dikena ngelatih tauka nempa rebak baru mantu raban bansa ti begunaka bantu.
“Tadi (kemari) kami udah madah ngagai Kepala Menteri bekaul enggau pengawa meri darah ke diatur kami tiap taun iya nya di Sarawak kami (Pampang Kuching) selalu ba penuduk tauka pemadu mayuh meri darah dikena mantu orang ke sakit,” ku iya.
Bisi datai ba pengerami nya kemari, Sapit Kepala Menteri Datuk Patinggi Tan Sri Alfred Jabu Numpang, Menteri Pemansang Tanah Tan Sri Datuk Amar James Jemut Masing, Menteri Wang Kedua Dato Sri Wong Soon Koh, Chairman PBSM Pampang Kuching Datuk Dr. Abang Abdul Rauf Abang Zain enggau Sapit Chairman PBSM Pampang Kuching Dr. Chou Chii Ming enggau ke bukai.