Taja pia pemujur nyekat rega barang bepanggai ba saup sereta pemintar pemeli empu: Stanley
KUCHING: Opis Dagang Dalam Menua, Gerempung Kerejasama enggau Pekara Bebeli Barang (PPDNKK) deka terus matau sereta mansik barang ke dijual di pasar, baik nya ba kandang mengeri tauka di menua pesisir, ngambika rega pemakai nya seruran nitih pematut.
Direktor PPDNKK Stanley Tan (gambar) madah, operasyen tu digaga kena beratika orang dagang di Sarawak nemu tanggungpengawa diri bekaul enggau tanda rega, ngena perengka timbang enggau sukat ke ditetap lalu rega barang ke disekat rega enda ditiki sepeneka ati.
“Iya ke patut dikeingat diatu, kitai ti orang pemeli enda tau enda ngelala hak diri lalu ari nya patut mereti sereta landik milih enggau bebeli.
“Penguna patut nemu manding rega barang lalu meli barang ari orang ke bejual nya enggau rega ke patut,” ku iya madah nengah email ke dianjung ngagai Bilik Berita kemari.
Operasyen PDNKK bedau lama tu tadi bisi meresa macham barang ke dijual di pelilih menua bukai baka Limbang enggau Lawas, lalu maya ngaga ‘Ripot Ops Rega 2014’ di pasar Lawas, ke alai 21 palan bejual barang bisi diperesa, iya nya di kedai farmasi, kedai ubat enggau kedai renchit.
Naka diatu, ari peresa sida iya di Lawas, Limbang enggau Sibu, Ops Harga PPDNKK Sibu, mungkur 18 kedai barang renchit, 3 buah mini-market enggau 3 buah kedai makai bisi diperesa.
Ba pekara ke sebaka, PPDNKK Sarawak bejalaika Ops Rega Barang dalam timpuh ke sama di sekeda pelilih menua tu baka di Limbang, Sibu, Pasar Bekenu, Pasar Batu Niah enggau Pasar lawas.
Dalam operasyen nya, penyalah ke bisi dirikod iya nya dua kes baruh Genteran Tusun Ukum Rega enggau (Anti Pencatutan tauka AKHAP) iya nya di Pasar Bekenu enggau penyampau ke ditangkap bisi berega RM129.90 lalu di Pasar Batu Niah tetemuka 10 paket gula pasir kasar sekilogram ke bisi dirampas laban penyalah enda ngelai rega barang nya.
“Lalu ba Ops Rega di Sibu mungkur 18 kedai renchit, tiga pasar mini enggau tiga kedai makai bisi diperesa lalu ari peresa nya, tetemuka dua bengkah penyalah baruh Genteran Tusun Ukum Timbang Sukat (ATS) dirikod,” ku iya.
Kelimpah ari nya, lebuh meresa 38 palan di Limbang ke mungkur 15 pasar, 18 kedai renchit, dua pasar mini enggau tiga pasar raya, atur nanda rega barang enggau perengka timbang diperati nitihka atur.
“Dikearap orang dagang tauka pedaja meri kerejasama ngagai PPDNKK laban enti ditemu sida tu bisi ngaga penyalah, kami (PPDNKK) ulih nyaman sida,” ku iya.