SIBU: Taja udah manggai keempat hari bilun MAS MH370 lebang tang bala kaban belayan enggau bala bakih Ketuai Pramugara bilun nya Andrew Nari mengkang nganti penatai iya.
Malam ensana, sida sebilik, kaban belayan enggau bala bakih betugung besembiang minta Tuhan ngintu pengelikun Andrew enggau sida ke bukai ti bela nepan bilun nya.
Pengawa besembiang nya bela diulu ke Rejang Park Rosary Group ti betuaika Justin Balang.
Aya Andrew, Augustine Liom maya dikerandau pengarang berita madah, taja pengelebang bilun nya mengkang empai ditemu, sida semampai besampi sereta pechaya ke kuasa Tuhan.
“Taja pengelebang bilun tu majak nadai kelai deka ditemu tang kami sebilik, kaban belayan enggau bala bakih mengkang besabar nganti pemulai Andrew,” ku iya.
Ku iya, sida sebilik kelebih agi indai Andrew, Catherine Tamoh, balat bendar ngetat ke ati ketegal penusah tu tang nguji deka nerima penusah enggau ati ti tebuka.
“Aku ngasaika tu meh keterubah iya penusah nyelai tu nyadi ba dunya. Ba ati aku, kami balat sinu ngenang pekara tu,” pia ku iya madahka baru.
Augustine madahka Andrew seiku anak ke manah kelimpah nyadi apai enggau laki ti dikesayau baikka sida sebilik tauka orang ti ngelala iya.
“Iya enda kala jai enggau orang bukai. Iya seiku ti kemerah. Aku ngasaika diri nyadi apai iya laban iya udah nadai apai agi pia mega aya iya ke bukai,” pia ku iya.
Iya mega madah, Andrew kala diau enggau iya di Kuching maya Andrew agi besekula sekondari suba.
Andrew suah pulai ke Sibu maya bisi pemisi.
“Kepenudi Andrew pulai ke Sibu maya ngintu Hari Krismas taun seiti nyin tadi,” ku iya enggau ati ti sinu.