SIBU: Perintah nengah opis ijinsi iya dipinta mansik baru chara nagang penusah angus rumah panjai ngambika enda nyadi agi.
Taja pan penusah angus rumah panjai ukai pekara ke baru nyadi, tang peranak rumah panjai endang ngarapka perintah ngelangkar chara baru nagang nya ngambika engkeman agi.
Kaunsilor Pasang Ngalambai madah, iya ukai mantah atur pengawa ijinsi perintah ke dipejalai ngelamatu.
“Tang, semina aku ngasaika program ngelamatu bekaul enggau chara nagang penusah angus enda tentu meri pangka ke besai ngagai peranak rumah panjai.
“Ba penemu aku, program ke diatur nya patut dipansik baru ngambika engkeman agi ungkup peranak rumah panjai,” ku iya ditu, kemari.
Ku Pasang, nyau ka tetiap program ke diatur di rumah panjai nerang pasal chara nagang penusah angus rumah panjai.
“Utai ti bangat ngenyinuka ati, nyau ka semua peranak rumah panjai madahka diri nemu lebuh ditanya bekaul enggau chara ngena kereban madamka api.
“Tang, bisi ari sekeda nya endang enda nemu ngena kereban madamka api,” ku iya ke ngarapka pekara tu dipasukka dalam program chara nagang penusah angus.
Pia mega, Kaunsilor Dr Ali Puji minta tetiap rumah panjai ke bisi bekal ai beresi ke enda jauh ari jalai besai disikap enggau paip bomba.
Ku iya, rumah-rumah panjai ke nguna sistem paip graviti mega patut nyendiaka palan nyimpan bekal ai ba tuju enti bisi kes angus ngenyit nyadi.
“Kekadang lebuh raban bomba datai rumah udah lengis diempa api. Berindik ari nya, aku minta ngambika tetiap rumah panjai patut bisi palan nyimpan ai kena nyikap diri betapi enggau penusah angus,” ku iya.
Iya mega minta Komiti Pemansang enggau Pengelikun Rumah Panjai (JKKK) rumah panjai ke besemak enggau rumah panjai ke dituntung penusah angus meri bantu baka duit ringgit.
Ku iya, tu dikena ngadang diri dulu seraya nganti bantu ari raban bukai baka wang turu penyah penusah.
“Ambis nadai RM200 dikena meli selap endur tinduk tauka kereban bukai,” ku iya.
Dr Ali mega ngarapka perintah berundingka perambu ngambika rumah panjai dibungkur insuran.
Tandu iya, enti sema bisi penusah nya tau dikena orang ke dituntung penusah ulih ngena insuran ke diterima sida kena ngaga rumah panjai baru.
Kelimpah ari nya, Kaunsilor Jimbau Galau ngelalau peranak rumah panjai beratika tukuh rumah sida ngambika digaga ngena chara moden.
Kediatu, ku iya, mayuh rumah panjai baru udah enggau benung digaga.
“Enti semua setuju ngena tukuh ke lebih moden tau nyamin pengelikun, nadai kebuah enggai nitihka tukuh ke moden nya.
“Anang legi ngaga rumah panjai nitihka pengulih diri empu. Tu deka ngenataika sebarang penanggul enti sema dituntung penusah angus kelebih agi enti bepun ari bilik ke nadai disapat enggau penebat api,” ku iya.