Anda di sini

Lapan rikod pechah ba pekit trek enggau padang, MSSM ti Ke-11

Advertisement

SIBU: Penyampau lapan rikod pechah dalam Berebutka Champian Pekit Trek enggau Padang Kaunsil Lumba Sekula Mukah (MSSM) Ke-11 ke tembu kena Hari Enam tu tadi ba Stadium Tun Zaidi ditu.

Chairman Komiti Pengatur, Anthony Poon, ke mega prinsipal SMK St Patrick nyebut dalam jaku pengelalu iya;

“Aku arap nengah lumba, mayuh agi atlet ke ngembuan talent deka diitemu ngambika bisi ngarika Pelilih Mukah dalam lumba ke besai agi ila.

“Pekara ke beguna bendar kitai enda ngetu belatih, liat dalam disiplin enggau pengepuh nyapai pemujur,” ku Poon.

Achara nya ke diatur berengkah ari 5 nyentuk ke 8 March dipasuk 11 bengkah kontingen ari beberapa buah sekula sekondari enggau tiga buah ari sekula primari, ke alai 581 iku atlet ngayanka penegar sereta pengering.

Sekretari Politik Kepala Menteri ke mega ADUN Jemoreng Abu Seman Jahwie bejadika pengawa nutup lumba nya.

Poon nambah, tu kedua kali lumba nya diatur di luar Pelilih Mukah.

Iya madah, ngatur lumba nya ukai sebaka enggau kitai ke nyebut aja seraya duit urung RM25,000 dipelanja ungkup tambang, alai diau ungkup atlet enggau pengereja pengawa, pemakai enggau ti bukai.

Iya gaga bendar meda lumba nya udah mujur, terima kasih ngagai sukung enggau kerejasama semua orang ke bisi ngambi bagi.

Berebak enggau nya, Abu Seman nerangka lumba nya sekeda strateji Opis Pelajar nempa nembaik ke bekaliber tinggi.

“Lumba kelimpah ari ngiring pengidup bepengerai mega nyungkak nempa ulah ke menuku, ngembing orang ngambika senurut enggau undang-undang ke tau begunaka amat dalam pemansang menua.

“Ngembuan penemu aja, enda umbas laban enda tau enda digembar enggau ulah ke menuku,” ku iya.

Iya mega nyebut lumba nya sebengkah penepan dikena nyungkak gempung antara raban bansa.

Bala pengajar ulih nguna awak tu ngerembaika jantil pengawa sida bekunsi sereta besilih penemu, ku iya.

Advertisement