Anda di sini

Veteran ATM patut ngasaika penyamai ari saup perintah

DIBASA, DIKEINGAT BELAMA: Talib (empat kiba) ngelekatka PJM ba baju seiku penerima midul seraya dikemataka Mohd Noor (tiga ari kiba) sereta sida bukai maya atur pengawa nya.

LUNDU: Veteran Raban Soldadu Malaysia (ATM) di menua tu patut bisi ngasai pengelantang lebuh nerima bantu ti disediaka perintah.

Menteri Muda Dagang Temuai Datuk Talib Zulpilip, ke mega Penyanding Penemu Gerempung Soldadu Veteran (PVTMS), bejaku munyi tu ba Pengerami Begulai sereta Berandau enggau Direktor sereta Veteran Soldadu Sarawak ditu kemari.

“Perintah udah ngemeratka Pengelantang pendiau raban veteran nya nengah chara nyendiaka mayuh macham bantu lalu arapka peluang enggau bantu nya ulih meri pengelantang ngagai sida,” ku iya.

Talib mega ngelalau raban PVTMS seruran ngenyemakka diri enggau gerempung ngambika sida enda tinggal ari ngasaika penguntung bantu ke diberi.

“Aku arap bendar ati PVTMS mantu semua kaban gerempung nya sereta ngembuan kaul ke manah enggau kaban gerempung, laban nya deka nguntungka kededua piak,” tandu iya.

Berebak enggau nya, iya mega bejadika pengerami nyuaka midul (PJM) ngagai 30 iku penerima ari Lundu, Kuching, Kota Samarahan, Padawan, Bau, Serian enggau Tebedu.

Bala ke nerima midul PJM nya baka Ah Kuan Keu, Ali Seman Ibrahim, Awal Nyampong, Azhar Din, Chamel Dewod, David Vincent, Dohen Diuk, Duwet Lihap, Grine Tohi, Henry Iran, Homping Musa, Ismail Brahim, Ismail Paie, Ismail Semawi, Jerry Gaweng, Johnny Parot, Lai Boo Sin, Lising Sipat, Maringai Leadang, Martin Ronnie Dabang, Matsalleh Yusof, Mohamad Ali Bohan Muda, Nuri Baie, Obeng Gapor, Othman Abdullah, Peehard Mangun, Reduan Busri, Simong Busu, Sogih Minet enggau Abang Saffian Abang Gani.

Nangkanka nya, Talib mega dipebasa nyuaka cheremin mata ngarika PVTMS ngagai 11 iku penerima ari Samarahan, Sri Aman enggau Kuching, ke alai pemeri datai ari IPTA ungkup sekeda bala veteran nya.

Bela bisi ngulu pengerami nya Direktor JHEV Mejar General Datuk Mohd Noor Daud enggau presiden PVTMS, Thomas Ling.

Advertisement