Anda di sini

Sebarang pemutus milih pengari BN di Balingian bepanggai ba KM

KUCHING: Sebarang pemutus milih pengari ba pengawa Bepilih Mit Balingian ti deka diatur kena 29 March tu ila, diserah ngagai Kepala Menteri (KM) ti mega chairman Parti Pesaka Bumiputera Bersatu Sarawak (PBB) sereta Barisan Nasional (BN) Nengeri, Tan Sri Datuk Amar Adenan Satem.

Sapit Ketuai Sayap Indu PBB, ti mega Menteri Pengintu Pengelantang Pendiau Raban Bansa, Pekara Indu enggau Pemansang Ruang Bilik, Datuk Fatimah Abdullah madah, pemutus milih pengari ba sitak nya ila bepanggai ba chairman Barisan Nasional (BN) iya nya Adenan.

“Sekalika pengari lelaki tauka indu, nya barang ku Kepala Menteri, tang pemerat iya, asal mih BN menang, ukai tak semina menang aja, tang menang enggau majoriti ke mayuh,” ku Fatimah.

Iya madah munyi nya ba aum media pengudah nyadi chairperson ba aum ‘Sarawak Walk of Love-Purple Walk’ di opis Biro Wanita ditu, nimbal pasal pengawa bepilih mit di Balingian enda lama agi.

“Enti nya chalun indu tauka ukai, iya deka diputuska sebengkah komiti ke diketuaika Kepala Menteri.

“Naka ke diatu, kami (indu) bedau dikangau baum pasal pekara tu tang dalam BN enggau PBB, tiap pekara deka dipejuraika sama-sama, laban tu chara kami milih chalun,” ku iya.

Sebedau nya, iya madah proses ngantung nama chalun pengawa bepilih mit Kunsil Nengeri (ADUN) Balingian deka diatur kena 17 March tu.

Ba atur pengawa nya mega, Fatimah nyuaka chek bantu RM3,000 ngagai Gerempung Jurugambar Media Sarawak (SPPA).

Advertisement