MIRI: Parti Islam Se-Malaysia (PAS), Parti Tindakan Demokratik (DAP) enggau Parti Keadilan Rakyat (PKR) Miri nebah deka terus bediri nyukung Kepala Penyakal Datuk Seri Anwar Ibrahim.
Nundaku Chairman PAS Miri Jofri Jeraie, sida ke dalam gempung Pakatan Rakyat (PR) seruran nyukung juang ketuai nya dalam hal adil rayat.
Tu berindik ari Hari Lima tu tadi kot udah ngelempai ukum jil lima taun ba Anwar pengudah Kot Apil nemu iya salah pengawa enggau pemantu iya ke suba nya, Mohd Saiful Bukhari Azlan dalam taun 2008.
“Nya sengaja digaga ngambika nagang Anwar ari betanding ba Pengawa Bepilih Mit (PRK) Kajang enggau udah nya nyadi Menteri Besai,” ku iya ba aum media ditu ensana.
Jofri enggau nya mega nekan perintah ke diatu nya merambu ‘munuh’ karier politik Anwar.
Tu ketegal prosiding apil kes bekaul enggau ketuai nya sengaja digaga semak enggau PRK ungkup Sitak Kaunsil Nengeri (DUN) Kajang.
Nundaku Jofri, dalam Islam sebendar iya enda chukup saksi ke alai Anwar tu salah sereta ngereja pengawa salah enggau pemantu iya.
Kes nya ku iya patut dipending di Kot Syariah lalu ukai di Kot Sivil laban orang ke dituduh nya orang Muslim.
“Tu pengawa madamka karier politik Anwar laban iya nyau beumur 70 taun sereta kelalu tuai nyadi Menteri Besai pansut iya ari jil ila,” ku iya.
Ba aum media begulai enggau DAP Piasau itu, ADUN Piasau Alan Ling mega nyebut pekara ke sebaka lalu irau ati enggau sistem pekara hakim menua.
Ling ke mega seiku luyar madah, bisi sekeda pekara bechiping dalam pekara nya.