Anda di sini

Anang ngayanka pengeringat ngagai perintah: Gramong

AKU BESEMAYA!: Benjamin (kiba) nyain surat mangku pengawa ba mua Gramong (kanan) seraya dikemataka Alexander (dua kanan).

Kaunsilor enda patut ngamahka pangku pengawa, enti asai enda puas ati duduk berunding ngelurus penemu

KANOWIT: Kaunsilor ke baru dipilih ditangkan ngambika enda ngamahka nama penuduk diri semina ketegal enda tepantup ati lalu kempang ngelaban perintah taja nemu pengawa nya ngelimpang ari tuju asal nyadi kaunsilor.

Menteri Muda Dagang Temuai enggau Pemansang Tanah Datuk Gramong Juna madah, kaunsilor dipilih laban perintah ngembuan pengarap ke besai ba sida laban ulih bejalaika tanggungpengawa nyaup ngemansangka rayat kelimpah ari ngembuan ulah ti tau nyadika chuan ba rayat bukai.

“Enti bisi pekara enda ngemuaska ati, kitai besedia betunga mua berandau ngiga chara mutarka penanggul tang ukai ngelaban perintah.

“Tang enti nadai chara bukai, sebedau ngaga penyarut tauka ngulu rayat bukai bejaika perintah, kitai minta sida (kaunsilor) nganjung surat ngetu gawa enggau lengkas,” ku iya.

Iya mantaika jaku munyi nya maya bejadika Pengawa Besumpah nyadi Chairman, Sapit Chairman enggau Komiti Opis Kaunsil Pelilih Mit Kanowit (MDK) bagi timpuh Januari 2014 nyentuk ke Disember 2015 ba Opis Pelilih Mit Kanowit ditu, kemari.

Pengawa sehari nya mandangka 30 iku dipadu nyadi kaunsilor nyengkaum kaunsilor lama ke dichiri megai pengawa nya baru.

Bela bisi datai maya tu iya nya Kaban Kunsil Nengeri (ADUN) Ngemah Alexander Vincent, Sekretari Politik Kepala Menteri Benjamin Angki, Chairman MDK Ibrahim Kipli enggau sapit iya Kaunsilor Benjamin Angki sereta bala bukai.

Gramong ti mega ADUN Machan madahka pengawa kaunsilor ti ngelaban perintah semina ngemalu perintah ti ngembuan pengarap ngagai sida.

Ku iya, penanggul endang bisi nyadi ba dini-dini endur tang ukai mai reti enda ulih diputar lebih agi nengah chara berandau enggau piak ti engkeman.

“Anang nyadi penanggul tang putarka penanggul ke bisi nyadi.

“Pia mega anang masau pengarap parti Barisan Nasional (BN), pemesai pemerintah enggau perintah ngagai kita,” ku iya nandu.

Iya mega ngarapka kaunsilor ke baru dipilih ngambika gawa bebendar lalu anang bekedumu ngatika diri lalu enggai nyengulai orang bukai.

“Seraya megai tanggungpengawa ke dilempai perintah, kaunsilor mega patut gawa begempung lalu anang ngembuan ulah kelalu ngeringka parti diri empu ngujungka enggai begulai gawa enggau orang bukai taja semua parti nya ari komponen parti BN magang,” pia ku lalau iya.

Gramong mega ngelalau bala kaunsilor kelimpah ari nyaup ngerembaika pemansang perintah sida mega patut ngemeratka pekara bekaul enggau rebak baru maya ke diatu.

Iya madahka diri bisi pengirau nangika nembiak lebih agi baka di Kanowit alah balut pekara ke enda manah nyerumba ubah maya rama diatu.

“Sebengkah chara dikena kitai ditu mutarka pekara tu iya nya ngiga jalai baka ni deka ngatur mayuh program ti diungkup ngagai nembiak.

“Perintah mayuh nyediaka penyikap baka padang, gelangggang futsal enggau perengka bemain bukai tang kitai patut nemu baka ni ngenjukka semua tu pulaika penguntung ngagai nembiak ari ke sida masau hari enggau pengawa ti enda menuku,” ku iya madah.

Nambahka nya, ku Gramong, bayar ngena perengka main nya mega anang kelalu minta besai ngambika enda nanggul raban nembiak bemain.

Advertisement