Anda di sini

Anang enda nyambung pelajar ba bidang teknikal, ku Fatimah

KUCHING: Nembiak pom 5 dilalau nyambung pelajar ngagai renggat tinggi agi, ukai semina ngetu naka sekula sekondari aja.

Menteri Pengintu Pengelantang Pendiau, Pekara Indu enggau Pemansang Ruang Bilik, Datuk Fatimah Abdullah ngelalau nembiak ke baru tembu besekula, nyambung pelajar sida ba bidang teknikal.

“Pemutus peresa Pom Lima dijangka deka dipadah enda lama agi, lalu berebak enggau nya penerang pengawa Pelajar Antarabansa The Borneo Post (BPIEF) siri kelima deka ngerintaika sekeda atur pengawa ke tau endur  nembiak sekula ngiga penerang ngambika muntang ngatur nyambung pelajar sida.

“Nya ukai semina kena nembiak tembu SPM aja, apai indai ke benung bekereja lalu nyangka deka nambah penemu sida iya, sama tau nguji meda sekeda peluang ke bisi disediaka maya BPIEF nya ila,” ku iya madah lebuh nyadi chairperson aum media BPIEF siri kelima ba opis iya ditu apin lama ke udah.

Fatimah madah, diatu udah mayuh nembiak sedarka pemerat pelajar teknikal ke beguna bendar dalam pasar pengawa ke diatu enggau pemansang SCORE ila.

Iya madah, pengawa deka ngemansangka diri dalam pelajar nyata bendar kala nyadi ba seiku nembiak ke kurang penatai pemisi tang udah  mujur ngubah pendiau sosio-ekonomi, pengelantang pendiau sida sebilik.

Iya mega ngelalau apai indai sama nguluka anak sida iya maya ngiga penerang pasal pelajar ngambika apai indai pan bela nemu pelajar ke dikerinduka anak sida lalu nemu enggau silik pasal kos ke deka diambi anak diri.

“Pia mega maya atur pengawa penerang ti mandangka bansa pelajar ke bisi di universiti tauka kolej, manah agi enti pemandang tu disempulang pengajar Motivasi enggau Kaunseling, ngambika bala nembiak ulih nanya penemu sida iya.

“Pia mega, enti ejensi bukai bisi nyendiaka lun kena belajar, sama tau enggau pengawa pemandang tu,” ku iya.

Pengawa pemandang BPIEF Siri ke-5 nya ila deka diatur di Palan Konvensyen Borneo Kuching (BCCK) kena 22-23 March belabuh ari pukul 10 pagi nyentuk 6 lemai.

Ba atur pengawa nya ila, urung 116 bengkah palanendur belajar ari menua tu enggau menua tasik ngulu atur pengawa tu, dikena matak urung 10,000 iku temuai ngagai pengawa penerang tu ila.

Sama bisi ngulu aum media nya kemari, Chairman Pengatur BPIEF siri-5, Dorge Rajah.

Advertisement