Anda di sini

Ngalai: Pasar Tamu Stapang patut ditangkir

SIBU: Pasar Tamu Stapang, kira pejalai 45 minit ngena kerita ari pusat bandar Sibu patut bendar ditangkir.

Utai tu patut digaga meda penambah orang ke bedaja dia maya ke diatu.

Gaya utai nyau enda betusun manah lebih agi datai maya ujung minggu, lebuh mayuh orang ke diau ngelingi kandang endur ditu nyau berebut bejualka asil utai ke ditanam sida sereta utai ke diulih.

Kunsilor Andrewson Ngalai (gambar) lebuh dikerandau kemari madah, peramabu nangkir pasar tamu nya deka dibantai ba aum Opis Kaunsil Pelilih Mit Menua Pesisir Sibu (MDLBS) ti deka datai.

“Penemuai raban opis nya ngagai pasar tamu laban deka meda nama ke dipeguna sida dia.”

“Nyadi aku arap, lebuh perambu tu dibantai ila nya deka nerima sukung ari semua piak,” ku iya lebuh ke dikerandau kemari.

Ku  Ngalai, maya ke diatu bansa barang ke dijual dia bechampur.

Bisi sekeda pedaja bejualka lauk babas, dagin, ikan berau enggau mega kuih.

Gaya utai tu ku iya meri gambar gaya ke enda lantang ungkup sida ke bejual enggau orang ke bebeli.

Ku iya bisi pasar basah tempat alai bejualka dagin enggau ikan ke disediaka opis kaunsil nya.

Tang pasar nya ku iya jauh ari tumpu mensia mayuh.

Nampung jaku iya, Ngalai mega nerangka pedaja di pasar tamu nya enggai enda pan bepekit enggau pedaja peranak menua bukai.

Advertisement