PADAWAN: Opis Menteri Pengawa Berumah (MOH) nengah ejensi iya, Housing Development Corporation (HDC) merambu deka nyendiaka mayuh agi ‘apartment’ di nengeri tu nitihka trend kemaya hari tu, alai peminta ‘apartment’ tinggi.
Menteri Pengawa Berumah, Datuk Amar Abang Johari Tun Openg madah, pengawa berumah ke mensia mayuh, enti rega tanah kelalu mar, Perintah deka ngemansangka ‘apartment’.
‘Apartment’ ku iya, bisi tiga blok (15 ringkat) udah digaga di Kpg Tabuan, ke dijangka tembu dalam kandang 2 taun tu, enda sebaka enggau flet, laban ‘apartment’ ke diperambu deka digaga Perintah sereta nyendiaka lif, bisi jaga, gim sereta palan endur belepa.
“Baka rebak baru diatu, rindu agi diau di ‘apartment’ laban pendiau sida iya, pendiau ke ‘mobile’, orang ke rindu bejalai tauka kemisi, jarang di rumah… ‘Apartment’ manah ke sida iya, laban sida iya enda irauka rumah kena tinggal lama laban bisi jaga nyaga endur nya,” ku iya.
Iya madah baka tu lebuh bejaku nutup atur pengawa ‘Team Building 2014’ MOH di Borneo Highlands Resort (BHR) ditu, kemari.
Kelimpah ari nya, iya madah, sida ke diau di menua pesisir lalu bisi rumah di menua pesisir tang gawa di nengeri pan begunaka rumah endur ngenduh’ (alai diau di nengeri), nya pan udah chukup manah, ku iya.
“Rega ‘apartment’ ke deka dijual Perintah jauh lebih murah ari baka ke dijual kompeni peribit, iya nya entara RM120,000 – RM150,000 seunit enggau pemesai urung 1,000 kaki persegi.
“Kebuah iya jauh endar lebih murah agi laban Perintah bisi perengka guna nyendiaka rumah bansa nya nyengkaum ngaga jalai, parit, perengka guna bukai ke enda patut ditanggung pemeli ke ngembuan pemisi ke numbas pemesai.
“Rega pan numbas iya, asal enda lebih ari RM200,000 seunit ba sekeda endur. Enti Perintah mujur nyendiaka tu, nya pulai ngagai penguntung rayat,” ku iya lalu nambah, perengka guna apartment baka tu deka digaga di sitak nengeri di menua tu, baka di Kuching, Sibu, Bintulu enggau Miri.
Abang Johari ti mega Menteri Dagang Temuai madah, naka ke diatu, pemar rega ke dijual kompeni peribit lalu penguntung ke diulih sida iya entara 80-100 peratus.
Baka dipelilih menua Kuching, Sibu, Miri enggau Bintulu, demografi pemayuh mensia ke diau diatu bisi manggai 58 peratus diau di nengeri sereta 42 peratus diau di menus pesisir.
“Manggai taun 2030 ila, dijangka 35 peratus aja ke agi tinggal di menua pesisir sereta 65 persin diau di nengeri. Nya alai, berat endar ba nengeri patut nyendiaka perengka guna pengawa berumah mayuh agi,” ku iya.
Ba atur pengawa nya mega, Abang Johari madah kebuah ejensi Perintah diatu majak ngaga mayuh agi rumah laban rega ke diatu dijual kompeni peribit jauh lebih mar, dataika mayuh orang ke ngembuan pemisi ke numbas pemesai enda tebelika rumah.
Nya alai ku iya, bedau lama tu tadi, MOH ngubah undang-undang sida iya ke udah dikemendarka maya Aum Kunsil Nengeri (DUN) bulan November taun nyin tadi, lalu meri kelala undang-undang baru setipak enggau ubah kemaya hari tu.
“Tuju iya ngambika Perintah ulih nyendiaka servis ngagai rayat bekaul enggau pengawa berumah lalu muntang dibeli mensia mayuh.
“Baka di semenanjung, diatu bisi trend ke dikumbai sida iya ‘Investors’ Club’, baka orang ke bemain Hoi. Sida iya mayar deposit, rumah nya pan baruh nama sida iya, lalu udah nya lagi sida iya madahka rumah nya udah dijual magang-magang.
“Tang lebuh pemeli kedua deka meli rumah nya lagi, pemeli keterubah deka nyual enggau rega jauh lebih tinggi. Nya kebuah nyadi ‘speculation’, ku iya.
Berindik ari nya, iya madah baka di Sarawak, rega rumah dua ringkat teres enda patut endar enti rega rumah nya dijual entara RM300,000-RM350,000.
“Enda patut endar. Enti rega minyak niki pan, tauka barang kena ngaga rumah, abis mayuh pan entara 5-10 peratus, lalu enti nitih pan, rega rumah teres dua ringkat patut dijual entara RM150,000 – RM160,000. Rega tanah pan enda ngemar nya,” ku iya.
Nya alai, iya madah MOH ngaga undang-undang baru bekerejasam enggau ejensi bukai alai sida iya ngaga mayuh agi rumah ke dijual (baka HDC, sida iya ngaga rumah nengah sayap ejensi nya, Daya Perumahan Sdn Bhd).
“Gaga ngena duit Perintah, lun pan ari bank baka selama, sereta Daya Perumahan pan enda bulih untung mayuh.
“Nya alai, enti Perintah ulih ngaga bansa nya, kami ulih ngayan ngaga kompeni peribit, rega rumah ke dijual sida ke diatu, enda patut dijual ngena rega nya,” ku iya.
Iya besemaka enti melaki bini makai gaji RM6,000 sebulan enda tebelika rumah, enda ibuh sebut orang ke begaji baruh RM3,000 diau di nengeri.
“Ni kitai tau nyekat orang bukai meli rumah kelebih agi sida ke bepindah ari menua pesisir ngagai nengeri, nyau enda tebelika rumah.
“Besemaka rega rumah ke digaga perintah, RM150,000, abis mayuh mayar lun sebulan semina RM600 dalam kandang 12-15 taun. Tang enti mayar rumah nyau RM2,300 sebulan, kelau gak nya,” ku iya.
Sebengkah ari projek ke deka digaga Perintah bechuntoka Rumah Mesra Rakyat (RMR), iya nya merambu ngaga projek rumah, alai Perintah deka nanggung kos nimuk tanah, jalai, perengka guna bukai enggau parit.
“Perintah diatu benung deka ngaga di Kpg Datu, Sibu, 30 unit ke deka dijual dalam urung RM140,000 seunit,” ku iya lalu nambah kos infrastruktur bansa tu enda patut ngasuh pemeli mayar.
Sama bisi ngulu atur pengawa nya kemari, Sekretari Mendam MOH, Wan Liz Wan Othman.