MIRI: Polis DiRaja Malaysia (PDRM) patut ngelunggarka atur milih nembiak bansa Iban ari Sarawak ke bisi ukir kelingai ba tubuh lebuh sida minta masuk nyadi rekrut polis laban pantang ba tubuh nya ngayanka adat asal bansa sida.
Seiku ex-polis, Peter Bong (gambar), 64, ari Miri madahka tebal ari nembiak Iban deka nyadi polis tang enda mujur dalam interviu setegal ditemu bisi kelingai ba tubuh.
“Kami minta perintah ngelunggarka atur ba nembiak bansa Iban ti ngembuan ukir kelingai ba tubuh ke deka minta masuk nyadi rekrut polis,” ku Peter lebuh ke dikerandau The Borneo Post kemari.
Nundaku Peter, nyau sinu kitai meda bala nembiak Iban, nadai pengawa udah nembu Pom Lima enggau Enam bisi minta polis tang enda bulih setegal bisi kelingai ba tubuh.
Ku iya, pemesai ke ngambi orang gawa ari Semenanjung Malaysia enda nemu Iban di Sarawak bisi adat enggau asal ke alai Iban bisi kelingai baka bunga Terong enggau ke bukai ba tubuh sida.
Peter madahka pemesai rekrut ulih nemu kelingai ke peranak asal enggau kelingai gengster ke jauh bendar bida.
“ Kami arap bendar kelingai Iban enda ngeruga pengelikun menua,“ ku iya.
Aku arap piak ke bekuasa enggau perintah Sarawak ulih mantu mutarka penanggul Iban enggau Dayak di Sarawak ke endang keran deka gawa ungkup menua dalam polis, tambah iya.
Bela sepenemu enggau iya, Julis Edwin, 52, madahka maya menua siga kelia tebal Iban ke gawa dalam polis enggau sedadu bisi kelingai.
Ku iya, kelingai ungkup Iban nya mandangka sida nya pungka lelaki ba raban bansa sida lalu polis Iban udah ngayanka pemerani sida ngelaban kominis.
Seraya nya seiku tuai raban bansa Iban, Pemancha Wilson Siang Lim madahka, kelingai asal enda tau enda di perunding PDRM.
Ku iya, kelingai ke bansa baru bisi rimau tauka remaung ke dipeda kasar enda tau dipilih nyadi polis.
“Kami ngarapka PDRM ulih belembut ba peminta raban bansa Iban ke udah angkunka menua indah maya menua agi siga suba, sida nya pungka lelaki ke nyaga menua Malaysia,“ tambah iya.