TEGULANG: Sarawak Energy (SEB) udah mantu meri pekayan sekula, kasut, enggau beg sekula ngagai semua nembiak sekula di SK Tegulang kena 20 Feb ngambika ngelempung tating penusah ruang bilik ke nadai ngembuan penatai pemisi tetap.
Ku penerang ari SEB, bisi penyampau 164 iku nembiak sekula ari SK Mentalun enggau 116 iku nembiak ari SK Tegulang beumur enam ngagai 12 taun bisi nerima pekayan sekula, kasut enggau rengka bukai.
“Udah nyau lebih ari tiga bulan pengelama sida ke udah pindah ngagai Tegulang enggau Metalun. Aku gaga ati meda sida udah masai enggau gaya pengidup dia mega ari ngena bantu ke diberi kami lebih agi ba pekara pelajar,” ku menjier besai Tanggungpengawa Rama Korporat (CSR) SEB Jiwari Abdullah.
SEB deka meri bantu tambah baka komputer enggau kereban sekula ba sebengkah inisiatif sida nangkanka tu ila.
Seraya nya, SK Tegulang enggau SK Metalun nya dua bengkah sekula ke ditumbuhka SEB ngembuan tuju meri pelajar sekula ngagai nembiak bansa Penan enggau Kenyah ukur ulih meri peluang ke manah ngagai sida dudi hari.
Sekula nya bisi alai 280 iku nembiak besekula lalu sekeda subjek ke dipelajar sida dia nya Bahasa Malaysia, English, Sains, Seni, Matematik, Lumba enggau Main, Pelajar Moral enggau Pengelandik Ngidupka Diri.
Sekeda ari program ke meri penguntung dipejalai SEB ungkup bansa asal dia nyengkaum ‘Home Garden’ enggau ‘Murum Penan Literasi’.