KENA MANAH: Dawos (dua kiba) nyuaka duit bantu ngagai seiku ari peranak 15 genturung pendiau di kandang menua Siburan enggau Padawan ke kena penusah ampuh bah kena 30-31 Disember 2013, seraya disempulang Kaban Kunsil Nengeri (ADUN)Tarat Datuk Roland Sagah (tiga kiba) enggau ADUN Bengoh Datuk Dr. Jerip Susil (empat kiba).
Sida patut ngetatka atur ngagai pemaju ngambika penusah ampuh bah ngenyit enda nyadi ba Kpg Tabuan Dayak
KUCHING: Opis Pengeraja Asal enggau Rampa Menua (NREB) patut dipesalah sereta ngembuan tanggungpengawa ngagai penusah ampuh bah ti ditapi peranak Kampung Tabuan Dayak.
Kebuah pia ku Sapit Menteri Pengeraja Asal enggau Rampa Menua Datuk Seri James Dawos Mamit, laban NREB ti megai tanggungpengawa matau ngambika pekara ti baka nya enda nyadi.
Nitihku iya, Sungai Tabuan diatu udah mit sereta nyau langkang berindik ari pangka pemansang dipejalaika pemaju ba endur nya ti enda nitihka atur sereta nadai dipatau NREB.
“Kompeni pemaju mesti ngembuan tanggungpengawa ngagai penusah tu tang sebedau nya undang-undang mesti dikena (nyalahka) ngagai sida (pemaju), lalu undang-undang nya ba baruh NREB, tang NREB enda ngemeranka undang-undang nya.
“Sida bisi ngaga EIA (Penilaian Impak Alam Sekitar) ba projek nya tang sida nadai kala bejalaika undang-undang. NREB patut dipesalah enti sida enda bejalaika undang-undang.
“Nya meh penyadi, sungai nya nyadi mit sereta langkang. Ba Sungai Tabuan uras ba baruh MBKS (Majlis Bandaraya Kuching Selatan), ti enda patut ngelakka ulah muai uras sengapa ke dalam sungai laban nya nutup pemansut ai.
“Penanggul bepun ari ijinsi perintah empu ti enda ngena undang-undang dikena nyalahka tauka ngelalau kompeni pemaju. Tu pekara perintah nengeri, ukai opis menteri perintah besai. Rayat empu mesti mai pekara tu ngagai NREB,” ku iya lebuh dikerandau pengarang berita.
Dawos ti mega Kaban Parlimen Mambong mansutka pekara nya lebuh dipinta meri penerang bekaul enggau penusah bah ti ditapi peranak Kampung Tabuan Dayak.
Dulu ari nya iya ngulu pengawa nyuaka Bantu Rayat 1Malaysia 3.0 sitak Parlimen Mambong enggau bantu duit renggat keterubah ngagai peranak di kandang menua Siburan/ Padawan 2014, ti diatur ba Dewan Masyarakat Siburan, di Siburan ditu, kemari.
Lebuh bejaku ba pengerami nya kemari, Dawos mega madah Sistem Parit enggau Tali Ai ke enda meruan mega ngujungka sekeda kandang menua tauka genturung pendiau ti baruh kena penusah bah.
Nya alai ku iya perintah ukai semina patut ngemanahka Sistem Parit enggau Tali Ai di mengeri tang patut sama ngemeratka kandang menua pesisir.
“Aku udah bejaku ngagai Opis Parit enggau Tali Ai (JPS) Sarawak ngambika ukai semina beratka kandang mengeri aja, laban kandang menua pesisir mega begunaka sistem parit enggau tali ai ti manah, dikena nyeliahka bah ngenyit nyadi,” ku iya seraya ngelalau peranak menua ngambika meri kerejasama ngagai (JPS) lebuh bejalaika pengawa.
Kelimpah ari nya, Dawos ngenang Rancangan Tebatan Banjir (RTB) ti dipejalaika di nengeri tu iya madahka RTB bisi udah digaga di Bau, Kuching sereta Sibu dikena nyeliahka penusah bah nyadi.
Projek RTB ti udah tembu iya nya di Bau, iya nya kitai ngena pam, lebuh ai masuk ngagai pegung endur nakung ai nya enti udah datai ba peninggi ti patut, dia lalu kediri ngepam ai ari dalam pegung dipansutka ngagai sungai.
“Di Kuching kami ngaga seiti tikuk, ngambika ai ari Matang enggau Batu Kawa ti masuk ngagai tikuk nya lalu terus dianyutka ngagai tasik. Projek di Kuching udah dipejalaika tang semina pemanjai 2 Kilometer aja enggau ungkup belanja RM100 juta. Kitai nguji minta belanja taun baru ngambi ulih ngemanahka agi,” ku iya seraya madahka di Sibu projek Rancangan Tebatan Banjir ba renggat kedua.
Nitihku iya, Sarawak nengah Opis Menteri Pengeraja Asal enggau Rampa Menua udah diungkupka RM160 juta dikena bejalaika projek Tebatan Banjir, sistem parit enggau tali ai sereta projek bukai ti bekaul enggau opis menteri nya.