Antara dua iku chalun ke tau diambi nya Datuk Anthony Valentine Laiseh enggau Akit Sebli
MIRI: Chalun ke deka ngarika Barisan Nasional (BN) ba pengawa Bepilih Mit (PRK) Sitak Kunsil Nengeri (DUN) Balingian manah agi dipilih ari raban Melanau Keristin.
Penganalisis Politik ke mega Lecturer Kanan Universiti Malaysia Sarawak (UNIMAS) Dr. Jeniri Amir madahka antara dua chalun ke tau diambi nya Ex-Mandal Residen Mukah Datuk Anthony Valentine Laiseh enggau Ex-Sekretari Mendam Opis Menteri Dagang Temuai Akit Sebli.
“Manah agi chalun dipilih ari raban Melanau Keristin sekali tu beratika gaya utai di sitak Balingian-Mukah,” ku iya lebuh ke dikerandau Utusan Borneo ensana.
Bekaul enggau pemenang, iya nyebut ukai utai ke mar ungkup BN terus bempu sitak nya.
Tu bepelasarka undi popular ba Pengawa Bepilih Nengeri (PRN) 2011 ke ngerikod penyampau 80 peresin.
“Aku nyangka ambis nadai undi nambah ngagai 85 peresin sekali tu,” terang iya.
Taja pia, nya bepanggai ba chalun ke patut nemu penekul enggau peneka rayat dia sereta dikerindu nembiak redak.
“Peranak di sitak dia agi bepegai kuat ba adat enggau pengawa lama lalu chalun mega patut nyamai enggau begulai,” ku iya sambil nambah manah agi mega enti chalun nemu bejaku dialek Melanau Mukah.
Berebak enggau nya, bekaul enggau isu-isu ke deka dikena dalam PRK DUN Balingian, Jeniri madahka nya mengkang bepusin dia ba politik pemansang.
Tang ku iya nya enda meri mayuh empas laban ex-ADUN Balingian iya nya Yang di-Pertua Negeri Sarawak Pehin Sri Abdul Taib Mahmud ke udah mujur mai ubah dalam infrastruktur ngagai sitak nya sebedau tu.
Bedau lama, Kunsil Pengawa Bepilih (SPR) nebah 29 March nya hari muai undi PRK DUN Balingian lalu pengawa nganjung nama kena 17 March.