KAPIT: Kaban Parlimen Hulu Rajang Wilson Ugak Kumbong ngarapka agih belanja tambah RM1 juta dikena ngaduka sekula di Sarawak deka mungkur sekula menua pesisir di Kapit.
Ku iya, tu beguna bendar laban sekula di Kapit kelalu mayuh ke patut diaduka baru ketegal udah tuai sereta lama.
“Aku arap bendar agih belanja tambah RM1 juta kena ngaduka sekula di Sarawak deka mungkur sekula di menua pesisir kelebih agi di Kapit,” ku iya bejaku maya pengerami nyuaka insentif pelajar ngagai nembiak sekula SK Sungai Paku ba Stadium Bletih, ditu.
Insentif pelajar nya ari Menteri Pemansang Tanah ke mega Kaban Kunsil Nengeri (ADUN) Baleh Tan Sri Datuk Amar Dr James Jemut Masing.
Berebak enggau nya mega, iya muji Pegawai Opis Pelajar Kapit Gawan Ringgit laban ulih meransang pengajar ngambika semampai bebendar bejalaika pengawa taja pan betapi enggau mayuh penanggul.
Tu ku iya, ngambika ulih nyaga nama manah sekula taja pan kurang perengkaguna ba sekula nya.
“Aku ke nyadi pengari rayat, besemaya deka semampai bejaku ke kita bekaul enggau isu ke ditapi kita ba sekula kelebih agi senentang rumah endur pengajar diau.
Ba pengerami ke diatur ASTRO nya, iya ngarapka kompeni ASTRO semampai nyaup peranak menua pesisir nyungkakka penemu penyambung enggau pemadah (IT).
Ugak andal pengawa ke diatur ASTRO sehari nya, ulih nyadika peransang ngagai nembiak sekula ngambika belajar bebendar ngulihka penemu nengah IT.
Bisi 19 iku nembiak nerima insentif pelajar nya. Ba pengerami nya mega, Ugak nyerahka Laptop 1 Malaysia ngagai sekula nya.
Antara nembiak sekula ke bisi nerima insentif pelajar RM100 nya Adelina Maju, Anissa Certa, Boniface Smirth, Brandon Legan, Ceriah Jennay, Claudio Rivalta, Eddie Bigam, Ester Vanessa, Mackson Baring, Missa Lyana, Priscilla Martha, Syline Sambau enggau Tracia Lisa.
Pia mega, tiga iku nembiak pengabis nyulut nerima insentif baka Alex Man (RM380), ditangkanka Zacky Paing (RM280) enggau Wilson Anyie (RM160).
SK Sungai Paku bisi 100 iku nembiak sekula enggau tiga belas iku pengajar.
Bisi datai ba pengerami nya Kepala Pengajar Syaiful Annuar, Sapit Residen Kapit Zul Usop, A.O Karon Mapus, Sekretari Politik Kepala Menteri Sarawak, Wilson Nyabong enggau Jefferson Jamit, pengajar enggau sida ke bukai.